Nang pumanaw si Douglas Quijano noong June 13, 2009, nagpasya ang mga pinakamalalapit sa kanya na paghati-hatian ang kaniyang abo. Sa huling araw ng lamay para kay Douglas, naghanda ng check list si Janice de Belen, isa sa mga artistang hawak ng talent manager, upang ang mga gustong mag-uwi ng abo ay mabigyan. Noon ay nasa Heritage Memorial Park and Crematorium pa ang mga labi ni Douglas. Doon na rin siya na-cremate.

Dito ay makikita ang grupo na ipinagdarasal si Douglas upang ito ay tuluyan nang manahimik. 

Ang abo ng talent manager ay nahati sa 20 maliliit na urns. Nang araw na ilalagay na ang mga ito sa iisang crypt, may walo pang urns ang hindi nakukuha. Nasa kamay pa ang mga ito ng ilang talents ni Douglas at ng ilang kamag-anak niya. Nananawagan ang mga kaibigan ni Douglas na dalhin ang urns na hawak nila sa St. Therese Shrine and Columbary.

Hindi common na paghiwa-hiwalayin ang mga abo ng isang tao. Paliwanag dito ni Leyte Representative Lucy Torres-Gomez, na isa ring talent noon ni Douglas: "Parang, kaming lahat, the only way for us to cope is to bring a part of him." Nitong nakaraang tatlong taon, ang maliit na urn na napunta kina Lucy at asawa nitong si Richard Gomez ay nakalagay sa altar sa kanilang kuwarto. 

Sina Lucy at Richard ang gumastos para magkaroon ng crypt si Douglas sa St. Therese Columbary. Sila rin ang nag-host ng salo-salo matapos ng ceremony.

Hindi makikita si Richard sa mga litrato rito sapagkat wala na siya nang dumating ang press. Matapos kasi nitong ayusin ang mga kinakailangan para sa seremonya, nagpaalam na ito. Nagtawag daw bigla ng taping para sa teleserye niyang Walang Hanggan. Sabi nito, "Pupuwede raw si Tita Helen ngayon, kaya taping kami." Ang tinutukoy niya ay si Helen Gamboa na kasama niya sa top-rating teleserye ng ABS-CBN.

Si Lucy at si Jomari Yllana ay ilan sa mga celebrities na nagabayan noon ng talent manager. Sa litrato, makikita silang nakatayo sa likod ng mga abo ng taong tinawag nilang "Tito Dougs."

Si Lucy ay napasama sa "pamilya" ni Tito Dougs nang pakasalan nito si Richard "Goma" Gomez, ang pinakamalaking artistang pinasikat ng talent manager. Pati si Juliana Gomez, ang unica hija nina Lucy at Richard, ay talent din ni Tito Dougs. Magpamilyang tunay ang relasyon ni Tito Dougs sa Gomez family: ninong siya ni Juliana, at kilala niya lahat ng mga Gomez at mga Torres. Labas-masok din siya sa pamamahay ng mga ito.

Sa kabilang banda, kilala rin nina Lucy at Goma ang lahat ng mga kamag-anak ng kanilang Tito Dougs at lahat ng mga kuwento sa makulay na buhay nito. Madalas din silang magkakasamang lahat sa mga biyahe abroad, personal man o official, at magkakasama rin sa mga pagbisita sa Ormoc, Leyte, ang lugar ng mga Torres.

Si Jomari ang naatasang magdala ng maliliit na urns sa columbary. Liban kay Jomari, ang iba pang Yllana brothers na sina Anjo at Ryan ay talents din ni Tito Dougs. Nang mga oras na dalhin sa columbary ang abo ng kanilang manager, nangyari namang si Anjo ay may live noontime show, ang Eat Bulaga!, at si Ryan, na councilor ng Parañaque, ay may council meeting.

Nakunan sa mga larawang ito (clockwise, from top) ang veteran entertainment editor na si Ricky Lo, ang talent manager na si June Torrejon, ang editor na si Ces Evangelista, at ang talent manager na si Neil de Guia.

Hindi alam ng marami na si Ricky, ang Philippine Star entertainment editor and columnist na nag-branch out sa telebisyon at naging celebrity endorser din, ay talent ni Tito Dougs.

Si June Torrejon naman na presidente ng PAMI (Professional Artists Management Inc.)—kung saan respetado si Tito Dougs bilang isa sa mga "elders"—ay malaki ang pasalamat hanggang ngayon kay Tito Dougs. Ayon kay June, pati ang personal na buhay niya ay bukas kay Dougs, na matiyagang pinakinggan ang lahat ng kanyang hinaing.

Ang manunulat at gurong si Ces Evangelista ay naging paboritong kabarkada ni Tito Dougs. Si Ces ang unang nakakita sa katawan ng talent manager nang ito ay natagpuang patay sa kabi-bless pa lang na bahay ni Douglas sa Lukban, Quezon. Ito ay dahil na rin sa madalas na bisita sa Lukban si Ces.

Si Neil de Guia ay manager ngayon ni Jake Cuenca at iba pang talents. Mentor ni Neil si Tito Dougs, na isa sa pinaka-successful talent managers ng bansa, ngunit higit pa roon, itinuring ni Neil na tatay si Tito Dougs.

Ang iba pang miyembro ng PAMI, isang organisasyo na by-invitation-only, ay naroon din upang dalhin sa crypt ang mga abo ng kaibigan at katrabaho nilang si Douglas.

Kasama rito sina Shirley Kuan at (clockwise, from left) Dolor Guevarra, Ethel Ramos, at June Torrejon. Bahagi sila ng mga tinawag ng pari upang magwisik ng holy water sa mga urns. 

Si Shirley ay manager ni Claudine Barretto, Joyce Jimenez, at Albert Martinez. Si Dolor ay manager nina Carmina Villarroel, Susan Roces, at Eric Quizon. Si Ethel ay manager ni Angel Locsin at kilala bilang nagpasikat kay Aga Muhlach. At si June ay manager ni Edu Manzano at mga humigit-kumulang na 20 pang artista, liban pa sa pagiging Viva executive nito.

Makikitang inaayos ang mga urn sa loob ng crypt ng mga malalapit kay Tito Dougs: (clockwise, from left) Marilen Nuñez, may-ari ng events agency na Len Plus; Lucy Torres-Gomez, congresswoman ng fourth district ng Leyte; Jo-Ann Maglipon, editor-in-chief ng YES! magazine at PEP; at Jomari Yllana, actor at businessman.

Malinaw sa alaala ni Jo-Ann na nang sinimulan niya ang YES! Magazine para sa Summit Media noong April 2000, wala siyang malalim na koneksyon sa showbiz. Si Douglas lang ang naisip niyang lapitan, dahil natulungan na siya ng talent manager nang editor in chief si Jo-Ann ng noo'y Gokongwei-owned Sunday Times Magazine.

Kusa ang tulong ni Douglas sa unang eight issues ng Sunday Times Magazine. Bagamat wala pang following ang magazine, na noon lang itinataguyod muli, binigyan ni Douglas ng pictorials and interview schedules si Jo-Ann para sa mga malalaking talents nito; sinamahan nito si Jo-Ann upang makuha ang kooperasyon ni Mother Lily Monteverde ng Regal Films, na noon ay nangungunang film production company sa bansa; at nagtatawag pa siya sa mga prodyuser at managers ng industriya na bigyan ng pagkakataon ang magazine.

Nang itinayo ang YES! noong taong 2000, ginawang "Editorial Consultant" ni Jo-Ann si Douglas, ang kaisa-isang showbiz person na nasa staff box ng magazine. "Kahit na noong wala na siya," sabi ni Jo-Ann, "matagal din bago ko naalis ang pangalan ni Tito Dougs sa staff box. Naisip ko pa nga sanang permanente na lang siya roon."

Dagdag ng editor ng YES!: "Ang liit pa ng YES! noon at lagi kaming nalalampaso ng katapat na magasin. Wala kaming advertising sa dyaryo at lalo na sa TV, sila meron. Walang pumapasok na ads. Akala ko nga magpo-fold up kami. Pero ni minsan hindi kami iniwan ni Tito Dougs. Lagi niyang pinahihiram ang mga talents niya kapag hiningi namin at tumatawag pa iyan sa ibang managers kapag pinahihirapan kami ng mga ito."

Isa pa, sabi ni Jo-Ann, "Wala kaming bayad kay Tito Dougs. Hindi naman namin kaya ang fees niya kung sakali. Good will at friendship lang lahat."

At sa maniwala man daw o sa hindi ang mga hindi nakakakilala kay Douglas, pinaninindigan ni Jo-Ann na ni minsan ay hindi siya sinabihan ni Dougs na gusto niya ng cover ng magasin para sa sinumang talent nito. "Ni minsan, walang pressure, hindi ako nalagay sa alanganin," ayon kay Jo-Ann patungkol sa relasyon ng YES! at ng talent manager. "Never ako nilagay ni Dougs sa sitwasyong mamomoblema ako kung paaano tumanggi."