Sinundo ng PEP team sina Daniel at Kathryn sa parking area ng building ng PEP, kaya nakita namin ang bagong-bagong grand Starex (inset) ng young actor. Noong August 17, ang mismong araw ng interview, unang nagamit ni Daniel ang kanyang unang pundar mula sa pag-aartista.

Ang loveteam nina KathNiel, na kasalukuyang napapanood sa Princess and I, ay madalas mag-trending sa Twitter. Para sa kanilang followers, gamitin lamang ang hashtag na #KathNielonPepTalk.

Kinakamayan dito ni Kathryn ang PEP associate editor na si Rommel Llanes, na isa sa naging interviewers sa edisyong ito ng PEP Talk. Kasama rin bilang co-host si Demai Sunio-Granali (gitna), senior staffwriter ng PEP Celeb Style.

Nanggaling man sa showbiz clan ng mga Padilla, naikuwento ni Daniel, o DJ, na noong una'y walang-wala sa mga pangarap niya ang maging artista. Ngunit kinalaunan, nagbago rin ang isip ni Daniel. Sabi nga nito, "Ngayon po, nung nagiging mature na po, okay lang naman po pala maging artista." 

Marahil mahirap kumawala sa tawag ng showbiz para sa isang katulad ni Daniel. Ama niya ang aktor na si Rommel Padilla, bagamat hiwalay na ito sa ina ni Daniel, ang dating aktres na si Karla Estrada. Si Rommel naman ay kapatid ng pinaka-pamosong Padilla, ang action star na si Robin Padilla, na kasal sa TV host na si Mariel Rodriguez.

Kaya si Daniel ay pinsan nina Queenie, Kylie, at Ali, mga anak ni Robin sa unang asawa. Pinsan din ni Daniel si Bela Padilla, isa ngayong talent ng GMA-7 at hinirang ng YES! Magazine na isa sa "100 Most Beautiful Stars of 2012."

Ang managing editor ng YES! magazine na si Anna Pingol ang naging guest host para sa third episode ng PEP Talk. Malapít na kaibigan ni Anna ang ina ni Daniel, ang dating artistang si Karla Estrada, o Karla Ford sa tunay na buhay.