Kasamang dumating ni Diether Ocampo ang umano'y bago niyang non-showbiz girlfriend na si Michelle Barrera.

Si Diether ay itinanghal na Star Magic Icon ng gabi ng Star Magic ball. Ang kasama niyang hinirang din bilang Star Magic Icon ay si Angelica Panganiban.

Halos magkasunod na naglakad sa red carpet ang ex-lovers na sina John Prats at Bianca Manalo. Pareho silang walang ka-date sa ball, bagamat kasabay ni John ang kaibigang si Sam Milby nang pumasok sa venue.

Naging "awkward" ang pagkikita nila, pag-amin ni John sa press nang usisain siya tungkol dito. Di rin  naman alam ni Bianca kung paaano isasalarawan ang unang pagkikita nila ni John, matapos silang maghiwalay three and a half months ago. 

Magkahiwalay namang dumating sina JM de Guzman at Jessy Mendiola sa ball. Malabo pa rin sa ngayon ang tunay na estado ng relasyon ng dalawa, kung meron man, bagamat aminado si JM na mahal niya si Jessy at patuloy niya itong sinusuyo.

Sinabi naman ni Jessy sa isang panayam sa PEP na espesyal si JM sa kanya, pero hindi pa ito handang magseryoso sa anumang relasyon dahil priority pa rin niya ang kanyang career.

Hindi rin magkasamang dumating sina Enchong Dee at Julia Montes. Bali-balitang nanliligaw si Enchong kay Julia, subalit nauna nang inamin ni Julia na ayaw muna niyang magka-boyfriend. Gusto rin niyang dumalo sa Star Magic Ball na walang ka-date.

Sa panayam naman ng PEP kay Enchong sa red carpet, sinabi nitong "hindi pang-may ka-date" ang suot niyang studded suit kaya minabuti niyang huwag nang magyaya ng ka-date sa ball. Noong isang taon, sa 5th Star Magic Ball, ang date ni Enchong ay si Erich Gonzalez.

Ngayong 6th Star Magic Ball, si Julia Montes ay hinirang na Sweetheart of the Night.

Dumalo sa pagtitipon ang magkasintahang Nikki Gil at Billy Crawford. Balik-Pilipinas na muli si Billy matapos mag-rekord sa Europa ng bagong album, na lalabas din doon bago matapos ang taon.

Magkasama namang dumating ang The Reunion co-stars na sina Kian Cipriano at Bangs Garcia. Ito ang first time na dumalo si Kian sa ball, matapos lumipat sa ABS-CBN nitong nakaraang buwan. Daring naman ang "gown" ni Bangs, na kinikilala bilang isang sexy actress.

Magkasama ang Mundo Man Ay Magunaw co-stars na sina Ejay Falcon at Empress Schuck. Nilinaw ng dalawa na walang ligawan na nagaganap sa pagitan nila. Magkaibigan lamang daw sila at ginagawa ang kanilang trabaho bilang magkapareha sa programa.

Magka-date din ang magkasintahang Gab Valenciano at Coleen Garcia.