Kung titingnan ang trend sa telebisyon, nakadagdag sa kulay at tagumpay ng mga game shows ang pagkakaroon ng isang dance group. Sa kaso ng Eat! Bulaga, binuo nila ang SexBomb, at nang nagkaroon ng sigalot sa pagitan ng management ng programa at sa manager ng dance group, binuo naman ang EB Babes. At ang dating katapat nito sa noontime slot ay nagkaroon ng Wowowee Dancers.

Maraming plano ang TV5 Talent Center para sa GAGA Dancers, na isasabak din daw sa recording at acting. Kilalanin sila...

Siya ay si Elena, 23, isang ballet dancer. Medyo mahiyain ito lalo pa't hindi siya gaanong bihasa sa Ingles. Sorry, guys, pero taken na ang Russian beauty ng grupo.

Si Mikhaela, 23, ay unang nagtrabaho bilang choreographer sa Cebu. Dahil matagal na siyang naninirahan dito sa bansa, kabisado na niya ang pagkaing Pinoy. Ang kanyang paborito: crispy pata.

Si Steph, 18, ay mula sa Australia. Siya ang pinakamatangkad sa lima sa taas na 5'9". Mahigit isang buwan pa lamang siya sa bansa at puspusan ang kanyang dance workshop sa ilalim ni Regine Tolentino.

Apat na taon nang naninirahan sa bansa ang Cuban na si Sumi, na kampante kausapin ang Game 'N Go hosts na sina Joey de Leon at Edu Manzano dahil parehong marunong ang dalawa ng Spanish, ang native language ng dalaga.

Si Natalia, 21, ay isang Australian. Magaling siyang kumanta. Sa katunayan, nagbigay ito ng sample sa pocket press conference. Nang tanungin kung sino sa mga local stars ang gusto niyang makatrabaho, nag-isip muna ito, tapos binanggit si Piolo Pascual.