First time dumalo ni Slater Young, ang hinirang na big winner ng PBB Unlimited season 4, sa Star Magic Ball. At excited na raw ito sa pag-ere ng ABS-CBN teleserye na A Beautiful Affair, kung saan makakatrabaho niya ang mga bidang sina John Lloyd Cruz and Bea Alonzo.

Isa si Ryan Bang sa mga ex-housemates na pinalad magkaroon ng career sa showbiz matapos ng stint niya sa reality show. Co-host siya ngayon sa It's Showtime at regular cast member ng Banana Split.

Si Ryan ay galing sa PBB Teen Clash of 2010.

Galing sa second season ng Pinoy Big Brother  si Dionne Monsanto. Madalas mapabilang ito ngayon sa mga teleserye o pelikula ng ABS-CBN at Star Cinema bilang supporting cast. Isa sa mga upcoming projects niya ang Suddenly It's Magic, ang pelikulang pagbibidahan nina Erich Gonzales at Thai heartthrob Mario Maurer.

Sumikat nang husto ang Cebuanang si Divine Smith sa mga fans ng reality show dahil sa angking "kaguwapuhan" nito. May hawig daw kasi siya sa international pop star na si Justin Bieber.

Marami din ang humanga sa kanya matapos aminin na isa siyang lesbian at may karelasyong non-showbiz girl.

Si Divine ay bahagi ng PBB Unlimited season 4.

Bagamat naging maiksi ang "buhay" ni Aldred Gatchalian sa PBB, isa naman ito sa pinalad na mabigyan ng TV at movie projects sa ABS-CBN. Kabilang sa kanyang recent projects ay ang Nasaan Ka Elisa? at Angelito: Ang Bagong Yugto.

Matatandaang nag-voluntary exit si Aldred mula sa Pinoy Big Brother: Teen Edition noon dahil sa nahirapan daw itong makibagay sa kanyang housemates.

Bagamat paulit-ulit nilang dine-deny na may relasyon sila, magkasama namang dumating sa Star Magic Ball sina Pamu Pamorada (left) at Kevin Fowler (right).

Kapwa ex-housemates ng Pinoy Big Brother Unlimited sina Pamu at Kevin.

Dumalo rin sa pagtitipon si Paco Evangelista, isa sa Big Four ng PBB Unlimited. Maagang na-evict noon si Paco, subalit pinalad na makabalik sa show bilang wildcard housemate.

Naging kontrobersiyal noon ang PBB Unlimited ex-housemate na si Joseph Biggel, matapos malaman ang katotohanan sa likod ng "inosente" niyang imahe.

Ayon kasi sa kanya, dahil umano sa kanilang kahirapan ay marami siyang bagay na hindi pa nararanasan gaya ng paglangoy sa swimming pool, pagkain ng ice cream, at pagsuot ng polo shirt. Pinabulaanan ito ng isang grupong nagpakalat sa Facebook ng mga larawan ni Biggel na sumasalungat sa mga nauna niyang pahayag.

Joj at Jai Agpangan! Marami ang naaliw sa identical twins nang bigyan sila ng task ni Big Brother na magpanggap bilang iisang tao.b Naging bahagi sila ng Pinoy Big Brother: Teen Edition 4.

Kahanga-hanga naman ang ipinamalas na talento sa pagsasayaw ni Kyra Custodio nang maging housemate ito ng PBB Teen Clash of 2010. Kasalukuyang nililibot ni Kyra ang bansa para sa mga road shows ng ABS-CBN, kung saan nakakasama pa rin niya ang mga dating ka-housemates.

Magkasama namang dumating sina Karen Reyes at Roy Requejo ng Pinoy Big Brother: Teen Edition 4. Parehong kabilang sa Big Four sina Karen at Roy, subalit habang nasa loob ng bahay ay na-link si Karen sa isa pang housemate na si Ryan Boyce.

Bagamat nagkapalitan ng linyang "I love you" sina Karen at Ryan, nilinaw naman nila sa panayam sa The Buzz nitong Hulyo na close friends lamang sila.

Isa rin si Deniesse Joaquin sa mga pinalad na magkaroon ng showbiz career matapos ang PBB Unlimited season four. Kasama siya ngayon sa cast ng Precious Hearts Romances Presents: Pintada.

Tila mas gumaganda naman ang pagtitinginan nina Carlo Romero at Wendy Tubasalla matapos aminin noong Mayo sa Kris TV na nagde-date sila. Nagkakilala ang dalawa sa PBB Unlimited Season 4, subalit iniwasan munang magkaroon ng relasyon dahil may boyfriend pa noon si Wendy.