Muling itatampok ang tambalang Xian Lim at Kim Chiu sa primetime slot ng Kapamilya Network. Sumikat ang loveteam na "KimXi" dahil sa teleseryeng My Binondo Girl.

Tatalakayin ng Ina Kapatid Anak ang "surrogacy" o ang pagbubuntis at pagpapaanak ng isang babae sa isang sanggol na pag-aari ng ibang mag-asawa. Nagiging posible ito sa kasalukuyan sa tulong ng modernong medisina. Bagamat mayroong kasunduan o arrangement sa pagitan ng babaeng nagdala ng bata at sa mag-asawa, papasok ang conflict sa kung sino ang may karapatan sa bata-ang inang nagluwal dito o ang sariling dugo't laman ng sanggol?

Ayon kay Xian Lim, ang kanyang role sa Ina Kapatid Anak ay isang "responsible, young, rich man." Magiging mas malalim daw ang karakter niyang si Liam dito, kung ihahalintulad kay Andy Wu na ginanapan niya sa My Binondo Girl. Sabi pa ni Xian, "Mas may pinanggalingan yung character ko dito."

Ayon kay Xian, mas komportable na sila ni Kim sa harap ng kamera ngayon. "Nung first time namin magkasama, nung first few times na magka-eksena kami, nakakakaba.... Ang hirap. Now, siyempre, mas comfortable... nalalaro na namin yung eksena."

Pinarangalan si Maja ng Best Actress award sa 2012 Gawad Urian noong Hunyo, bagay na inamin niya sa isang panayam na nagbibigay sa kanya ito ng pressure.

Bagamat hindi niya binibigyan ng limitasyon ang sarili sa mga proyektong gagawin, sinabi niya, "Hanggat kaya at kailangan kong ibigay at kailangan ng script at ng istorya, at kung yun yung mas magpapaganda sa kuwento, ibibigay ko."

Inihambing ni Maja ang kanyang karakter sa Ina Kapatid Anak sa isang "sapatos na makinang at mamahalin, pero hindi nagagamit at nasa loob lang siya ng kahon... Paano pag lumabas na yung sapatos?" Sinabi rin ni Maja na ang istorya ng kanilang teleserye ay iikot sa paggawa ng sapatos bilang isang family business.

"To play a kontrabida role, yun yung ‘Yes!' Kasi marami kang magagawa, eh. Minsan nga mas masarap pa yung role nila," excited na pahayag ni Janice de Belen nang makausap siya ng PEP.ph (Philippine Entertainment Portal) ukol sa role niyang si Lucille sa Ina Kapatid Anak.

Sa unang pagkakataon ay gaganap na kontrabida ang aktres sa isang teleserye. Dagdag pa ni Janice, "Kung parating mabait, corny na, eh. Gusto mo naman ng spice. Gusto mo naman ng konting anghang. Na-challenge [ako], oo. Kasi you have to bring out the inner bad!"

Napanood si Janice bilang ina ni Gerald Anderson sa advoca-serye na Budoy (2010). 

Mula sa pagiging kontrabidang si Jean Dimasupil-Sy sa My Binondo Girl, gagampanan ni Cherry Pie Picache ang karakter na Theresa sa Ina Kapatid Anak.

Wika ng aktres, "Very excited ako kasi ang tagal ko nang hindi nagiging mabait! Parang puro na lang kontrabida! Tapos puro dark yung character! Na-miss ko na yung umiiyak. Tapos nami-miss ko na rin yung hindi nagbibihis, yung ‘as is where is.' Plus I'm really, really excited about this soap. It's one of the best roles I've gotten in all the soaps I have done for ABS-CBN."

"Awkward?" Pabirong saad ni Janice dahil nag-alinlangan siyang tanggapin ang role bilang asawa ng karakter ni Ariel. Sa totoong buhay kasi ay asawa ni Ariel ang kapatid ni Janice na si Gelli de Belen.

Ayon kay Janice, "Medyo mahirap nang slight. Kasi parang weird yung feeling, di ba? But as an actress you have to get past that! So, talagang mahirap sa umpisa but when you get past it, okay naman."

Ang former beauty queen turned actress na si Pilar Pilapil ang gaganap na Yolanda, ina ni Theresa (Cherry Pie Picache) at Lucille (Janice de Belen). Anak ni Yolanda si Theresa kay Zacharias (Ronaldo Valdez) at anak naman niya si Lucille kay Julio (Eddie Gutierrez).

Wika ng aktres, "I always want it to be better than the last time. It should be better every day, every time we work on something. It should be better or else there is no growth."