1. DOLPHY

Isa sa pinakamalungkot na pangyayari sa showbiz ngayong taon ay ang pagyao ng Comedy King na si Dolphy.

Pumanaw si Mang Dolphy noong July 10, 2012, sa edad na 83, pagkatapos ng tatlong taong pakikipaglaban sa sakit na chronic obstructive pulmonary disease (COPD).

Sa loob ng mahigit na anim na dekada ay pinasaya ng Comedy King ang mga manonood sa kanyang mga palabas sa pelikula at telebisyon—kunsaan pinasikat niya ang ilan sa hindi malilimutang mga karakter—kaya naman nagluksa ang sambayanan sa kanyang pagkawala.

Naulila ni  Dolphy ang kanyang partner na si Zsa Zsa Padilla at ang labingwalo niyang anak mula sa iba't ibang karelasyon noong nakaraan.

2. CLAUDINE BARRETTO

Naging maingay ang pangalan ng aktres na si Claudine Barretto sa 2012, hindi dahil sa kanyang mga proyekto kundi dahil sa mga kontrobersiyang kinasangkutan niya.

Ang pinakamalaking ingay ay ang alitan sa pagitan niya at ng asawang si Raymart Santiago sa mga Tulfo brothers na sina Mon, Ben, Raffy, at Erwin.

Nagsimula ang lahat nang magkaroon ng engkuwentro sa pagitan ng mag-asawa at ang komentaristang si Mon Tulfo sa Terminal 3 ng Ninoy Aquino International Airport (NAIA) noong May 6.

Nauwi sa suntukan ang pagkuha ni Mon ng video, sa pamamagitan ng kanyang cell phone, habang kinukumpronta ni Claudine ang isang ground stewardess matapos maiwan ang kanilang mga bagahe sa Boracay.

Nakunan sa cell phone ng ilang pasaherong naroon sa airport ang ginawang panununtok nina Claudine kay Mon Tulfo.

Pagkatapos ng insidente ay pinagbantaan naman on national television ng mga kapatid ni Mon na sina Ben, Raffy, at Erwin sina Raymart at Claudine.

Nagpalitan ng demanda ang magkabilang kampo at hanggang ngayo'y dinidinig pa ang kanilang mga kaso.

Bukod sa pagkumpronta sa isang empleyado ng airline, balitang nagwala rin si Claudine sa isang ospital, kung saan pinagsisigawan daw nito ang isang doktor at ilang staff.

Naging masalimuot ang career ni Claudine ngayong taon dahil hindi na ni-renew ng GMA-7 ang kanyang kontrata. Lumipat sa Kapuso network si Claudine matapos ng halos dalawang dekadang pananatili sa Kapamilya network.

Nagkaroon din si Claudine ng enkuwentro sa ilang stars ng Kapamilya network (Angelica Panganiban) at maging sa ilang executives nito (Johnny Manahan) nang siya ay umalis na sa ABS-CBN.

3. ANNABELLE RAMA

Naging laman hindi lamang ng balita ang talent manager na si Annabelle Rama kungdi maging ng korte.

Ito ay dala ng kaliwa't kanang mga kasong isinampa ng mga dating magkakaibigan:  Amalia Fuentes vs. Annabelle; Annabelle vs. Amalia; Nadia Montenegro vs. Annabelle; Annabelle vs. Nadia; Ynna Asistio vs. Annabelle.

Kaugnay ng mga kasong ito ay nakipagpalitan din ng maaanghang na salita si Annabelle laban sa kanyang mga katunggali—sa print at maging harap-harapan.

Hindi malilimutan ang eksenang nangyari sa pagitan nina Annabelle at Amalia sa mismong misa para sa libing ng asawa ni Amalia na si Joey Stevens noong April 3.

Ilang beses ding nagpang-abot sina Annabelle at Nadia sa kanilang paghaharap sa husgado para sa pagdinig ng kanilang mga kaso.

Sa mismong burol ng Comedy King na si Dolphy ay gumawa rin ng eksena si Annabelle nang habulin niya ang showbiz writer na si Chito Alcid, na kilalang malapit kay Amalia.

Ngayong 2012 din nag-file ng kanyang kandidatura si Annabelle bilang representative ng North District ng Cebu sa 2013 elections.

4. SHARON CUNETA

Hindi gaanong gumawa ng ingay ang Megastar na si Sharon Cuneta ngayong taon pagdating sa kanyang career, bagkus ay naging laman siya ng balita dahil sa mga kontrobersiyang kinasangkutan niya.

Una na rito ang pagpatol niya sa kanyang bashers sa social networking site na Twitter. Naging bukas si Sharon sa paglabas ng kanyang saloobin sa mga isyu—na umani ng batikos mula sa netizens.

Depensa ng Megastar, ipinagtatanggol lamang niya ang sarili at ang mga mahal niya sa buhay, partikular na ang kanyang panganay na anak na si KC Concepcion.

Kabilang sa mga nakabangga ni Sharon sa Twitter ay ang mga tagahanga ng aktor na si Piolo Pascual, na ex-boyfriend ni KC Concepcion.

Sa Twitter din niya inilabas ang kanyang saloobin sa inakala niyang mga pahayag laban sa kanya ni Kris Aquino. Matapos niyang pasaringan si Kris, napag-alamanan nitong "parody interview" lamang pala kay Kris iyon ng isang blogger.

Sa huli ay humingi ng paumanhin si Sharon sa kanyang ginawang papatol sa tweets ng iba at nangakong hindi na siya magpapaapektong muli.

Ngayong 2012 din umigting ang alitan sa pagitan ni Sharon at ng kanyang tiyahin na si Helen Gamboa. Pero kalaunan ay nagkaayos din ang dalawa.

5. DEREK RAMSAY

Isa sa pinakamalaking balita ngayong 2012 ay ang pag-alis ng aktor na si Derek Ramsay mula sa ABS-CBN upang lumipat sa TV5 noong Abril.

Marami ang nagulat sa naging desisyon ni Derek dahil sunud-sunod at pawang malalaking proyekto ang ibinigay sa kanya sa bakuran ng Kapamilya network.

Ang sinabing dahilan ni Derek sa kanyang pagpirma ng three-year exclusive contract sa TV5 ay gusto niya ng "change" at hindi raw niya mapapalampas ang mga proyektong inaalok sa kanya, gaya ng pag-host ng London Olympics at ng The Amazing Race Philippines.

Ngunit hindi matigil ang ingay na walang loyalty si Derek kundi sa sarili nang mapag-alamang P300 million over three years ang offer ng TV5 sa kanya upang lumipat.

Matapos ng pag-alis ni Derek sa ABS-CBN ay ang rebelasyon ni Anne Curtis na bawal banggitin ang pangalan ng aktor sa promotion ng pelikula nilang A Secret Affair sa mga programa ng Kapamilya network.

Naging makulay din ang lovelife ni Derek dahil ngayong taon nagtapos ang more than five-year relationship nila ng Kapamilya actress na si Angelica Panganiban.

Kinumpirma ni Derek ang breakup nila ni Angelica sa pamamagitan ng kanyang Twitter post noong May 14.

Iginiit ng aktor na walang third party sa kanilang hiwalayan, bagamat lumabas ang pangalan ng isang Frisbee player na nagngangalang Alexa Amos, na ngayon ay girlfriend ni Derek.

Lumabas din ang pangalan ni John Lloyd Cruz, na boyfriend ngayon ni Angelica, ngunit marami ang naniniwalang pumasok lamang sa eksena si John Lloyd nang break na sina Angelica at Derek.

Nagulo lang ang kuwento dahil hindi inamin nina Angelica at Derek sa publiko na matagal na silang walang ugnayan. Hindi pa rin maganda ang relasyon nina Angelica at Derek sa ngayon, kahit bilang magkaibigan man lang.

6. ANDI EIGENMANN

Isa rin sa lumikha ng ingay ngayong taon ay ang young actress na si Andi Eigenmann.

Kasabay ng kanyang pagbabalik sa showbiz—sa pamamagitan ng teleseryeng Kahit Puso'y Masugatan at pelikulang A Secret Affair—matapos isilang ang anak na si Elie ay ang mga kontrobersiyang nanggaling sa mga nakaraang isyu sa kanya.

Hindi pa man sila nagkakaayos ng itinuturong ama ng kanyang anak, si Albie Casiño, nagwakas rin ang relasyon ni Andi sa kanyang boyfriend na si Jake Ejercito.

Ang pinaniniwalaang dahilan ng breakup nina Andi at Jake ay ang naging pahayag ng ina ng young actress na si Jaclyn Jose tungkol sa mga magulang ni Jake.

Sa isang interview ay nagpahiwatig si Jaclyn na tila hindi pabor ang mga magulang ni Jake, na si dating Pangulong Joseph Estrada at ang mistress nitong si Laarni Enriquez, sa relasyon ng anak kay Andi.

Dahil din sa naging pahayag na ito ni Jaclyn ay nagkaroon ng hidwaan sa pagitan nila ni Andi.

7. MANNY PACQUIAO

Kumpara noong mga nakaraang taon na pulos tagumpay ang iniuuwi ni Manny Pacquiao pagkatapos niyang makipaglaban, ngayong taon ay dalawang pagkabigo sa boxing ang natamo ng Pambansang Kamao.

Una ay ang kontrobersiyal na split-decision loss ni Manny sa American boxer na si Timothy Bradley sa kanilang June 9 fight sa Las Vegas, Nevada.

Pangalawa ay ang nakagigimbal na knockout loss ng Pinoy champ sa ika-apat na paghaharap nila ng Mexican boxer na si Juan Manuel Marquez, nito lamang December 8, sa Las Vegas, Nevada rin.

Kaugnay ng kanyang dalawang magkasunod na pagkatalo, lumabas ang isyu ng pagpapalit niya ng pananampalataya—dati'y Katoliko siya, ngayon ay Born-Again Christian.

Bagamat sinabi ni Manny na mas napalapit siya sa Diyos dahil sa pagbabasa ng Bibliya at pagbabahagi ng mga salita ng Diyos, mismong ang ina niyang si Mommy Dionisia ang kumastigo sa hindi na niya pagsusuot ng rosaryo sa kanyang mga laban.

8. LIAN PAZ

Naging palaisipan sa marami ang paghihiwalay ng mag-asawang Lian Paz at Paolo Contis pagkatapos lamang ng halos apat na taong pagsasama.

Isiniwalat ni Lian ang paghihiwalay nila ni Paolo sa isang press conference noong September 12.

Noong una ay hindi malinaw kung ano ang totoong dahilan ng kanilang paghihiwalay, ngunit sa live interview ni Lian sa Showbiz Central noong October 28, inamin ng dating EB Babes dancer na may kinalaman sa pera ang problema nila.

Sinabi rin ni Lian na may "third party" sa hiwalayan nila—ito ay mula sa parte diumano ni Paolo.

Mariing itinanggi ito ni Paolo, at sa ilang nabitiwan nitong sagot sa media, nagkaroon ng hinala ang publiko na ang kakulangan ng kita ngayon ni Paolo sa showbiz ang dahilan.

Ayon sa isang source ng PEP, sinasabing may ugali si Paolo na pala-blowout at mapagbigay-luho sa mga minamahal dahil sanay ito sa malaking kita.  

9. KRIS AQUINO

Naging makulay rin ang taong ito para sa TV host-actress na si Kris Aquino.

Early this year ay na-annul ang five-year marriage nila ng basketball superstar na si James Yap.

Bagamat naputol na ang kanilang relasyon bilang mag-asawa ay hindi natatapos ang kanilang ugnayan dahil may anak sila, ang dating tinatawag na Baby James na ngayon ay tinatawag na Bimby.

Ang paminsan-minsan nilang pagkikita o pag-uusap ay nagiging dahilan upang patuloy pa ring magkaroon ng hindi pagkakaunawaan sa dating mag-asawa.

Ngayong Disyembre nga lamang ay pinabulaanan ni Kris ang naging pahayag ni James na maayos ang relasyon nila ngayon.

Bagamat hindi nagbigay ng detalye si Kris sa dahilan ng kanilang alitan, idiniin ng prangkang aktres na hindi sila "okay" ni James.

10. IWA MOTO

Naging matunog din ang pangalan ng sexy star na si Iwa Moto ngayong 2012 dahil sa mga kontrobersiyang kinasangkutan niya.

Una na rito ang pag-amin niyang totoong ikinasal sila ng mixed-martial arts fighter na si Mickey Ablan.

Matagal nang usap-usapan na ikinasal sina Iwa at Mickey, pero mariin nila itong pinabulaanan noon.

Ngunit sa isang interview ay inamin ni Iwa na nagpakasal sila ni Mickey noong October 2009 sa Cavite.

Nagkaroon din ng isyu sa pagitan ni Iwa at ng Kapamilya actress na si Jodi Sta. Maria. Ayon kay Iwa, nagkaroon ng ugnayan noon si Jodi sa asawa pa niya noon na si Mickey.

Ngunit tila sadyang pinagsasalubong ng tadhana sina Iwa at Jodi dahil, pagkatapos makipaghiwalay ni Iwa kay Mickey, ang karelasyon ngayon ng StarStruck alumna ay si Pampi Lacson, ang nakahiwalayang asawa ni Jodi.

Nagkaroon din ng isyu si Iwa sa original home network niya na GMA-7 nang sampahan siya ng kasong breach of contract dahil sa paglabas niya sa mga programa ng TV5 nang hindi pa natatapos ang kontrata niya sa Kapuso network.