Nakuha ng The Buzz ang dalawang panig ng isa sa pinakamainit na isyu last week sa showbiz—ang alitan sa pagitan ni Sunshine Cruz at ang kapatid ni Cesar Montano na si Maria Mercedes "Ched" Manhilot Cantu. Nagsampa ng kasong libel si Sunshine noong nakaraang linggo laban sa kapatid ni Cesar dahil diumano sa paninirang-puri.

"Durog na tayo, inaapak-apakan pa tayo," pahayag ni Sunshine pagkatapos magsampa ng kasong libel laban kay Ched noong June 10.

Natukoy raw kasi ni Sunshine na ang kapatid ni Cesar ang naglabas sa Friendster at e-mail account ni Ched ng mga paninira diumano sa pagkatao ng aktres.

May ilang taon na raw nakakatanggap si Sunshine ng mga sulat mula kay Ched. Puno raw ito ng mga mapanirang paratang na pawang inaatake ang aktres. Ang ilan sa mga linyang binitiwan sa e-mail at friendster website ang sunud-sunod na masamang salita.

Ayon sa abogado ni Sunshine na si Atty. Bonifacio Alentajan, "Dalawang kaso ng libel laban kay Ma. Mercedes Manhilot-Cantu. Sapagkat gumawa siya ng mga publications sa Internet ng masasamang bintang laban kay Sunshine, paninirang-puri, at kung anu-ano pang mga malalaswang description."

Sabi naman ni Sunshine, "Hindi ko naman gusto na ganito talaga, pero napuno na ako. Hindi ko na kaya."

Dagdag niya, "Gusto kong iklaro that this has nothing to do with my husband Cesar Montano. Kung ano ang laban ko ngayon, laban ko ‘to sa kanyang kapatid."

Nilinaw naman ni Sunshine na hindi kasama si Angela sa demandang isinampa niya laban kay Ched. Pero inamin niya na masama ang loob niya dahil sa mga lumabas na balita.

"May sama ng loob siyempre. Parang kasi naimpluwensyahan siya ni Ched," saad ng aktres.

Pero ayon naman kay Sunshine, hindi lang daw siya ang apektado sa kontorbersiya.

"My family, yes! They are affected. Kasi nabasa nila, e. Like my sister in Paris and Macau. They saw everything, and even my Mom. Mom ko ngayon may sakit ‘yan, didiretso dapat sa ospital ‘yan. Pero nandito siya just to support me," lahad ni Sunshine.

Itinanggi rin ni Sunshine ang kumakalat na balitang pagpa-file niya ng annulment case sa kasal nila ni Cesar.

"No, it's not true," sambit niya.

CHED SPEAKS UP. Nagbigay naman ng pahayag sa The Buzz ang kapatid ni Cesar na si Ched na naka-base na sa Italy.

Ayon kay Ched, "I don't see any reason to take it seriously after all. Kasi I'm an Italian citizen, the Philippine court has no jurisdiction over me."