Matapos ang kontrobersiyang kinasangkutan ni Ruffa Gutierrez at beauty queen turned actress Riza Santos kaugnay sa diumano'y hindi pamamansin ng huli sa mga senior at more established stars sa set ng ABS-CBN primetime series na I Love Betty La Fea, heto't maugong naman ang balita na pinagsabihan daw ng comedienne na si Giselle Sanchez ang dating Bb. Pilipinas-World at MTV VJ na si Maggie Wilson.

Ayon sa report ng kolumnistang si Jojo Gabinete ng Abante ay nagkaroon ng tensiyon sa pagitan ng dalawa matapos diumanong hindi batiin ni Maggie si Giselle sa dressing room nang mag-guest ang dalawa sa programang SiS kamakailan.

Ayon sa mga saksi, narinig daw nila si Giselle na pinagsabihan si Maggie sa dressing room ng ganito: "Sa susunod, ikaw ang unang bumati sa akin dahil mas senior ako sa ‘yo!" 

Sa blog entry in Giselle, hindi naman ikinaila ng PEP blogger ang naturang pangyayari. Pero nilinaw niya na nasabi niya iyon dahil mahigit 20 minutes na silang nag-uusap-usap na mga guests at tanging si Maggie lang ang hindi niya kilala o bumabati sa kanya.

Ayaw na sanang patulan ni Giselle ang issue. Tinatawanan na nga lang daw ng komedyante ang lahat. Pero gusto lang niyang maging malinaw ang kuwento.

Sa kanyang blog dito sa PEP (Philippine Entertainment Portal) na may pamagat na G-Spot ay sinabi ni Giselle: "Natatawa ako sa ‘non-issue' namin ni Maggie Wilson. ‘Di ko talaga matatawag na issue ito. Aba'y masama ba magbigay ng advice sa mga baguhan?"

Nais lang daw magpayo ni Giselle at wala naman itong balak na pagalitan o pahiyain ang magandang modelo.

"But I was sincere on my advice," paliwanag ni Giselle. "In fact when I saw that, you did not take my advice with humility, it was I who humbled myself in front of you by holding your hand and telling you softly, ‘I hope you did not get offended with my advice. I'm just trying to teach you the proper decorum.'"