Naging matagumpay ang 5th Walk of Fame ni German "Kuya Germs" Moreno na ginanap sa Central Plaza ng Eastwood City Walk sa Pasig City noong Miyerkules, December 1.

Naging tradisyon na ni Kuya Germs na magbigay ng stars para sa local celebrities tuwing December 1.

This year, hindi lang mga artista ang kanyang napiling bigyan ng kani-kanilang stars sa kahabaan ng Eastwood kundi pati news and broadcast personalities, athletes, at isang foreign actor.

THE STARS. Dumating halos lahat ng kabilang sa Walk of Fame sa taong ito.

Mainit pa rin ang pagtanggap kina Sheryl Cruz at Manilyn Reynes ng fans na nasa Eastwood City Park.

Ang tawag nga kay Sheryl ng mga tao ay "Fabiola," ang kanyang wicked character sa GMA-7 telefantasya na Grazilda. Samantalang "Elsa" naman ang tawag kay Manilyn dahil sa character niya sa comedy series na Pepito Manaloto.

Natawa naman si Manilyn nang may tumawag pa sa kanya na "Corazon," ang character niya sa local adaptation ng Mexican telenovela na Marimar.

Masaya naman ang world-champion bowler na si Paeng Nepomuceno dahil siya lang ang athlete na binigyan ng star sa Walk of Fame sa taong ito.

First time daw niyang mabigyan ng gano'ng klaseng parangal at iti-treasure daw niya ang moment na iyon.

Nagtilian naman ang fans para kina Coco Martin at Jericho Rosales.

Gabi na nang dumating sina Kim Chiu at Gerald Anderson, pero hinintay pa rin sila ng kanilang fans. Galing pa kasi ang dalawa sa kani-kanilang mga trabaho.

Nangako kasi ang Kapamilya love team kay Kuya Germs na darating sila to personally see their stars on the Walk of Fame.

THE NEWS ANCHORS. Ang ganda namang makitang magkakasama ang news anchors na sina Noli de Castro, Mike Enriquez, Korina Sanchez, at Mel Tiangco na binigyan ng stars sa Walk of Fame.

Nagkaroon pa nga ng pagkakataon na magkuwentuhan at magtawanan sina Mike, Noli, at Mel sa harap ng mga TV camera.

Kahit na magkalaban ang mga news programs nila na TV Patrol (Noli) at 24 Oras (Mike at Mel), ipinakita nila na trabaho lang ang lahat at magkakaibigan pa rin sila. Lalo na kina Noli at Mel na original partners sa TV Patrol.