Nagmimistulang freedom wall ng ilang fans ang microblogging site na Twitter, kung saan ang pinakahuling subject of "bashing" ay si Bianca Gonzalez.
Kamakailan, isang supporter ng Azkals ang nakabangayan ni Angelica Panganiban, na nag-post ng kanyang opinyon tungkol sa balitang pagkakaroon ng indie film ni Phil Younghusband.
Nitong nakaraang Sabado, Marso 5, isang Tweeter—na may-ari ng account na @Kristina_PJ at nakarehistro sa pangalang Yzabelle Aquino—ang nag-post ng isang pagbabanta sa timeline ng SNN co-host.
Heto ang nilalaman: "fyi, malapit na matapos ang career ni @iamsuperbianca with the video we are soon to upload."
Ang Tweeter ay unang nag-post noong Enero 2009. Pero almost a year pa ang lumipas bago ito ulit nag-post noong Disyembre 2010. Simula noon, umabot na sa 126 ang tweets ng user. Kasama rito ang isang panawagan: "pls help me in bashing Bianca G."
Nagpakilala si @Kristina_PJ bilang isa sa mga kaklase ni Bianca noong high school sa De La Salle Santiago Zobel School. May isa ring tweet kung saan nabanggit niya na kaklase rin niya ng model-turned-host sa kolehiyo. Si Bianca ay nagtapos ng kolehiyo sa Ateneo de Manila University.
Ayon pa sa "hater" ni Bianca, ang kanyang paninira ay bunsod daw ng isang pangyayari noong nasa high school pa sila. Hindi naman niya tinukoy kung ano ito.
"@iamsuperbianca it seems you have forgotten what you did to me way back in highschool at Zobel. now its my turn," sabi ng Twitter user noong Enero 11.
Noong Enero 25, idinagdag nitong nagtrabaho siya sa Kapamilya network: "i got to know the real Bianca Gonzalez when I am still working at ABS so I have the right to bash that [expletives]."
Bukod sa tweets, nag-upload na rin ng isang sexy photo ni Bianca noong Marso 5. Naka-address ito sa ilang Twitter users, kasama ang PBA player na si JC Intal na napapabalitang nakaka-date ngayon ng Pinoy Big Brother host.
Sinundan pa ito ng isang pagbabanta na, "i am going to upload the video soon on how a [expletive] she is!"
Napag-alaman ng PEP (Philippine Entertainment Portal) na ang naturang larawan ay nailathala sa 10th anniversary issue ng Preview magazine noong Hunyo 2005.
DEFENDING BIANCA. Bagamat naging sunud-sunod ang mga mapanirang Twitter posts ni @Kristina_PJ, nanatili namang tahimik si Bianca.
Hindi naman nagkulang ang mga followers at kaibigan ng Kapamilya celebrity sa pagtatanggol sa kanya. Isa na rito ang Star Cinema Adprom director na si Roxy Liquigan.
Sa Twitter, heto ang isinagot niya: "@Kristina_PJ sa tweet mo, sinisiraan mo si @iamsuperbianca helloooo! Insecure ka ramdam ko. Nananahimik yung tao kung anu ano pinagkakalat mo. Insecure ka."
