Hindi pa alam ni Dingdong Dantes kung aahitin na niya ang bigote ngayong tapos na ang taping nila ng I ♥ You Pare ng GMA-7.

"Baka kasi gamitin namin sa pelikula kaya hindi ko pa alam kung aalisin ko na," sabi ni Dingdong tungkol sa gagawin niyang horror movie with Lovi Poe.

Ang tentative title nito ay Aswang.

Nakausap ng PEP.ph (Philippine Entertainment Portal) at ilan pang media people si Dingdong sa last taping day ng romantic/comedy show nila ni Iza Calzado, sa Fernbrook Gardens sa Alabang, Muntinlupa, noong Miyerkules, May 18.

Paano niya ide-describe ang naging experience ng paggawa ng I ♥ You Pare?

"Ito, sobrang masaya. Pinakamasayang show talaga na nagawa ko!

"Aside from the fact na talagang comedy siya to begin with, at yung buong atmosphere mula umpisa hanggang dulo.

"Walang moment na talagang may tension, may negative vibes—lahat talaga halos perfect na."

Ang pag-alis lang ng co-star niyang si Regine Velasquez sa mga huling linggo ng comedy serye ang ikinalungkot niya. Kinailangan ni Regine ang pahinga dahil buntis siya.

"Puwera lang talaga nung si Ate nga, hindi na makaganap as Tonya.

"Yun lang, pero bukod doon, everything was perfect," saad ni Dingdong.

Ano ang pinakamami-miss niya sa show?

"Yung Boiler Room!" mabilis niyang sagot.

Ito ang club sa Marikina Riverbanks kung saan regular na nagti-taping ang show, bilang Club Love, na mina-manage ni Dingdong bilang Kenneth.

"Parang naging bahay ko na talaga, e," sabi niya.