Binawi agad ni Hayden Kho Jr. ang mensahe niya sa Twitter na nagpapahiwatig ng pagkakaroon ng affair ni Dra. Vicki Belo sa isang lalaki na pinangalanan niyang Al Galang.

Kagabi, February 20, nag-tweet si Hayden ng dalawang messages na tinawag niyang "real proof of infidelity."

Pero ngayong madaling-araw, February 21, ay biglang kumambiyo ang dating cosmetic surgeon.

Ayon kay Hayden, nagawa lamang niyang mag-tweet ng mga ganun tungkol kay Dra. Belo "[at] the height of my anger."

At taliwas sa mga una niyang paratang, idiniin ni Hayden na, "Vicki DID NOT have an affair with that guy."

Ang "that guy" na tinutukoy niya ay si Al, isang yoga instructor.

Base sa impormasyong nakalap ng PEP.ph (Philippine Entertainment Portal) sa Internet, si Al ay lumaki sa San Diego, California.

Bago naging yoga instructor ay naging modelo muna siya at nanalong second runner-up sa Mossimo Bikini Summit noong 2007.

Kalakip sa tweet kagabi ni Hayden ang larawan ni Al, pati na ang diumano'y handwritten letter ni Al para kay Dra. Belo na may petsang "10/16/11."

Pero ilang minuto lamang pagkatapos niyang i-post ang mga mensaheng ito ay binura rin agad ni Hayden.

Sa kanyang tweet ngayon, sinabi nito na bagamat totoo ang letter, "Vicki and I spoke about it already and I believe her."

Nagkausap na rin daw sila ni Al at humingi raw ng paumanhin ang huli tungkol sa letter.

"I have forgiven him and that's finished," sabi ni Hayden.

Sa pangalawang pagkakataon, sinabi ulit ng doctor-turned-entrepreneur: "Vicki NEVER cheated on me."

NOT HAVING AN AFFAIR. Samantala, pinabulaanan din ni Hayden ang nababalitang relasyon diumano nila ni Nancy Castiglione.