Actions speak louder than words. 

Pero sa kaso ni Mark Escueta, drummer ng Rivermaya, at ni Jolina Magdangal, parang magkatimbang talaga ang paggawa at salita. 

Ito ay base sa ipinapakita nilang pagmamahal sa isa't isa.

Kapansin-pansin nga ito sa 32^nd birthday celebration ni Jolina sa Thaipan restaurant last Saturday, November 6. 

Bukod sa kanyang birthday celebration ay nagkaroon din ng photo exhibit si Jolina ng 32 photos niya.

Sa pagkakaalam ng PEP (Philippine Entertainment Portal), si Mark ang nagbigay ng idea kay Jolina, na matagal nang may personal na hilig sa photography, para magkaroon ng photo exhibit.

Pero paglilinaw ni Mark, ang manager ni Jolina, si Perry Lansigan, ang may kagagawan nang pag-mount ng photo exhibit kasabay ng birthday celebration.

Aniya, "Matagal ko nang sinasabi sa kanya na mag-exhibit. Pero ang may ideya nito sa birthday niya, si Perry Lansigan. Pero dati rin, sina-suggest ng daddy niya at saka ako. Pero si Perry rin ang nakaisip na isabay sa birthday niya."

Ngunit ayon kay Jolina, sa kanilang dalawa raw, si Mark ang mas magaling kumuha ng pictures. Anong masasabi rito ng musikero?

"Hindi, e, nahihiya lang siya," nakangiti sabi ng guwapong drummer.

"Pero magaling talaga siyang photographer. Kahit hindi niya inaamin, which is good din. Maganda rin na natural hobby niya ang photography. 

"Ayaw nga niyang mag-exhibit kasi hindi naman daw siya professional. Wala siyang training, hindi niya alam ang technical.

"Pero sabi ko nga, hindi importante 'yan, e. Basta sinasabi nilang may mata sa photography, siyempre, meron siya."

Nakita nga raw agad ni Mark sa girlfriend ang talent na 'yon.                       

"Noong una ko ngang makita ang mga gawa niya, sabi ko, 'Ang ganda ng mga gawa mo. Bakit hindi ka mag-exhibit?' Para ma-share niya rin sa ibang tao na may iba pa palang side of Jolina."