Abot-tenga ang ngiti ng R&B singer na si Jay-R nang makausap siya ng PEP (Philippine Entertainment Portal) kahapon, Nobyembre 22, sa Cravings Restaurant sa Tomas Morato, Quezon City.

Dito niya pinirmahan ang endorsement deal niya para sa Kaspersky, isang Internet security at anti-virus software.

Masaya si Jay-R, 29, dahil sa bago niyang endorsement, at dahil na rin sa tagumpay ng kasintahan niyang si Krista Kleiner, 21, sa Miss International pageant na ginanap sa China.

Nakapasok si Krista sa Top 15 at nanalo ng special awards na Miss Expressive at Miss Talent.

Agad ding dinepensehan ni Jay-R ang kanyang kasintahan sa patuloy na mga paninira rito. May mga nagsasabi kasi na hindi bagay maging beauty queen at mukha raw "bold star" ang baguhang artista at singer.

Ayon kay Jay-R, "obvious" naman na beauty-queen material ang kanyang girlfriend.

"Kung ganun yung sinasabi nila, it's not true kasi she is a beauty queen. She got the Miss International sa Binibini [Binibing Pilipinas]. She got into the Top 15 sa Miss International mismo.

"So, hindi naman totoo siguro yung sinasabi nila. Pang-ano lang yun, pang-haters lang siguro," sagot ng singer.

Dagdag pa niya, hindi na raw masyadong nasasaktan si Krista sa ganitong mga paninira.

"Dati, nung bago siya. Pero ngayon, medyo sanay na siya, e. Ang daming... Tulad ng sinabi mo, pag may magandang nangyayari sa isang artist, maraming nega na lumalabas.

"Pero she's used to it now. So, dinededma niya na lang.

"Pero, you know, I explain to her, 'Gano'n talaga ang show business, may lumalabas na ganito, so don't feel bad.' And she understands that now," saad ni Jay-R.

MISS INTERNATIONAL. Nauna nang nabasa rito sa PEP ang kuwento ni Krista tungkol sa hindi magandang karanasan niya pagkatapos ng Miss International pageant sa China.

Kuwento ni Krista, may ipinapa-endorse daw sa kanilang isang produkto na labag umano sa kanyang paniniwala. Tumanggi raw si Krista na gawin ito. (CLICK HERE to read related story.)

Naikuwento na ni Krista kay Jay-R ang pangyayaring ito, at todo-suporta naman ang singer sa naging desisyon ng girlfriend.

"I support her because she knows what's right and wrong," sabi ni Jay-R.