Naunang dumating si Robin Padilla sa Powerplant Mall para sa special screening ng Tum: My Pledge of Love kagabi, March 14. Hindi muna ito pumayag na magpa-interview sa media at hinihintay niya raw muna ang asawang si Mariel Rodriguez.
Matapos ang tatlumpung minuto ay dumating na si Mariel para samahan ang Bad Boy of Philippine Cinema. Agad naman silang sumalang sa panayam ng nag-aabang na entertainment press.
Sinabi ni Robin na hindi away ang dahilan kung bakit hindi niya kasabay ang asawa na dumating sa venue ng screening. Ayon sa kanya, busy raw kasi si Mariel na tulungan muna ang mga anak niyang sina Queenie at Kylie, at iba pang kamag-anak, na magbihis.
"Kaya ko siya iniwan. Sabi ko, 'Teka muna, marami na yung bisita natin dun. Tutal mag-asawa tayo, teamwork tayo! Ikaw na muna dito, punta na ako dun. Marami nang bisita,'" kuwento ni Robin.
"Wardrobe ako kanina," paglilinaw naman ni Mariel. "Wala kaming away. Akala kasi nag-aaway kami... Kasi may biglang tumawag sa akin bakit daw hindi kami sabay dumating. Dinivide namin yung... Kasi we're partners."
Ang Tum: My Pledge of Love ang unang pelikula kung saan magkasama sina Robin at Mariel. Si Robin din ang direktor at scriptwriter nito. Sa India ang shooting ng karamihan sa mga eksena sa pelikula.
Sa April 6 pa ito ipalalabas sa sinehan, pero kagabi nga ay nagtanghal na ito ng special screening para sa mga kaibigan ni Robin at sa mga tauhan ng Indian Embassy.
Puring-puri ni Mariel ang asawa dahil sa "galing" umano nito sa paggawa ng pelikula.
"Excited ako kasi ngayon makikita na nila kung gaano kagaling si Robin. Hindi lang bilang actor kundi bilang isang direktor," pahayag ni Mariel.
"Kasama ka dun, kasama ka dun," sagot naman ni Robin para sa asawa.
Dagdag ng aktor, si Mariel kasi ang inspirasyon niya sa paggawa ng Tum: My Pledge of Love.
"A, siyempre, palagay ko yung long wait ng paghahanap ng materyal, si Mariel pala ang magbibigay ng idea, at magbibigay nung inspirasyon. Masaya ako! Kasi matagal nang panahon, hinahanap ko yung hudyat, yung tulak. Kaya ngayon, siguro, lalo niya pa akong bibigyan ng inspirasyon para gumawa uli."
Dagdag niya, tila true-to-life raw ang pelikulang ito.
"Kasi, nung nakilala ako ni Mariel, hindi ko akalain talaga na malalim siya. Kasi napapanood ko sa TV, masayahin lang siya, parang okay lang lahat. Nung nagkakilala kami, nakita ko ang lalim niyang tao, nasakyan niya yung mga kabaliwan ko. Ginawa namin, isinulat namin, ginawa naming pelikula," sabi ni Robin.
Natuwa naman si Mariel sa sinabi ni Robin. "I'm very flattered na ganun ang tingin niya. At sana maging inspirasyon pa rin ako para makagawa pa siya ng isa pa dahil sobrang talented niya.
