Naging biktima pala ng sexual harassment ang EB Babes member na si Lian Paz noong eight years old pa lamang siya. Bukod pa rito, naranasan din niyang maging battered girlfriend noon kaya naman hindi maiiwasang mauwi ito sa pagiging man hater ng dancer ng Eat Bulaga.
Tampok ang life story ni Lian sa Magpakailanman ni Mel Tiangco na ipalalabas this Thursday, November 22, sa GMA-7. Sinadya ng PEP (Philippine Entertainment Portal) si Lian kagabi, November 19, sa taping ng naturang programa at dinatnan namin siyang kaeksena sina Jay Manalo, Glaiza de Castro, Joseph Bitangcol, at iba pa.
Inusisa agad namin si Lian ukol sa hindi magagandang karanasan na pinagdaanan niya noon sa kanyang buhay.
"Actually, dahil nga po sa mga bagay na ‘yon, may trauma ako sa mga lalaki, dati pa," panimula niya. "Ngayon hindi na ako man hater talaga, masaya naman ang buhay ko with the help of my parents and friends.
"Pero siyempre, alalay pa rin dahil minsan bumabalik pa rin sa akin yung mga bagay na ‘yon, e. Hindi pa rin totally nawala, may times na napapanaginipan ko pa rin ito."
Totoo bang muntik na siyang ma-rape noong bata pa siya?
"Hindi naman po actually muntik ma-rape... I was eight years old that time at may kapitbahay kami na tina-touch-touch niya ang ilang sensitive parts ng katawan ko. So, parang sexual harassment po ito at simula nang nangyari ‘yon, never na akong bumalik sa mga lola ko," paliwanag ni Lian.
Dagdag niya, "Pero hindi naman pumasok sa isip ko na gumanti or what, ipinasa-Diyos ko na lang po. Kaya nang sabihin po ni Ma'am Malou [Choa- Fagar] na ipi-feature ang life story ko sa Magpakailanman, hindi na ako nagdalawang-isip pa. Gusto ko rin kasing magbigay ito ng lesson sa mga kabataan. Kasi ipapakita rito na hindi dapat mawalan ng pag-asa, huwag maggi-give up sa lahat ng challenges. Instead, dapat na maging mas matapang sila. Dapat tingnan nila ang brighter side ng mga bagay na ito."
BLOOMING CAREER. Sinabi rin ni Lian na masaya siya sa takbo ng kanyang career. Bukod kasi sa laging humahataw ang ratings ng Eat Bulaga, umaasa siyang ang paglabas niya sa Magpakailanman na ang simula ng pagsabak niya sa acting.
"Sana ay [ganoon] na po ‘yon," sambit niya. "Sa tingin ko nagmu-move on sa next level [yung career ko] at sobrang thankful ako kay Lord dahil sa pagkakataong ito na matagal ko na rin hinintay.
"Mula nang pumasok naman kami sa Eat Bulaga, sinabi ni Ma'am Malou na dapat ay versatile ang EB Babes. Malaking bagay sa akin na tinutulungan ako ng mga kasama ko."
Payag ba siya sakaling magkaroon ng project na pagsamahin sila ng boyfriend niyang si Mark Herras?
"Opo naman, why not? If bibigyan ng opportunity, yes, okay sa akin," walang kagatol-gatol niyang sagot.
RELATIONSHIP WITH MARK. Ukol naman sa pag-amin ni Mark sa tunay nilang relasyon, noong una'y ayaw magsalita ni Lian subalit hindi na rin siya nakaiwas nang kunin ng PEP ang reaksiyon niya sa ginawa ng young actor.
"Masaya po ako nang sabihin niya sa isang interview na almost nine months na kami. Hindi ko nga po alam na sasabihin niya ‘yon and mas masaya dahil marami siyang projects. Natutuwa ako na kahit alam ng mga tao na may girlfriend siya, okay pa rin yung mga ka-loveteam niya," pahayag ni Lian.
