Sa maagang pagpanaw ng binatang aktor na si Marky Cielo, naiwang nagdadalamhati ang dalawa sa pinakaimportanteng tao sa buhay niya—ang kanyang mga magulang na sina Mrs. Mildred Cadaweng at Mr. Bobby Cielo.
Sa halip na mapag-usapan ang kalungkutan na kanilang nararamdaman, sinariwa ng mga magulang ni Marky ang mga masasayang ala-ala na naiwan sa kanila. Sa kanilang hiwalay na panayam sa Showbiz Central na ipinalabas kahapon, December 14, napag-usapan kung gaano naging mabuting anak si Marky.
Ayon kay Mrs. Cadaweng, "Ang talagang hindi namin makalimutan sa kanya ay talagang inuuna niya kami. Sobra niyang mapagmahal sa amin, sobrang kami ang inaalala niya, inaalagaan niya. Kami 'yong pinapasaya niya, bago ang sarili niya."
Sa kabilang banda, si Mr. Cielo naman ay napangiti habang kinukwento ang pagpapatawa ng kanyang anak. Aniya, "Minsan may mga ano 'yan, spontaneous lang na patawa, mga expression sa mukha. Minsan tatakbo na lang 'yan sa gate, 'tapos biglang mag-pose o mag-try, ‘Mama, tingnan mo ako, Mama!' In fact, sa kalikutan niya, minsan nasugat na sa kamay dahil nabali sa akyat nang akyat. Minsan sa kalikutan niya lagi."
Nabanggit din ng ama ni Marky ang pagkahilig ng kanyang anak sa arts at kung paano nito napabuti ang kanilang relasyon bilang mag-ama.
"Si Buknoy [palayaw ni Marky], grabe ang interest niya sa arts. Noong una, visual arts ang kanyang training. Later, dine-develop ko ang kanyang skill sa dancing. So, napakabilis at napakadali lang niya turuan. Kapag bata pa, talagang meron siyang sketches na sarili niyang ginawa. Doon ako natutuwa dahil 'yong interpretation makikita."
Dagdag pa ni Mr. Cielo, naging magkatuwang din sila sa paglalakbay ni Marky sa larangan ng showbiz noong nag-uumpisa pa lamang ito.
"Minsan, bago mag-contest, may system kami, mag-uusap kami, ‘O, ano ba ang concept mo, idea mo sa theme? Ano ba ang gusto mong i-project sa theme na 'yan?' Ang sa akin lang naman, ibang feeling kapag father ka at manalo 'yong anak mo, na may interest din pala siya sa ganung bagay, ibang tuwa," lahad ng ama ni Marky.
Dahil sa mga ito, lubos ang pagkagulat ni Mr. Cielo sa pagpanaw ng kanyang panganay na anak.
"Gulat, shock ako sa balita. Hindi ko naman ine-expect na mangyari," malungkot na sabi niya.
PREMONITIONS OF MARKY'S DEATH. Ayon kay Mr. Bobby, hindi rin naman nagkaroon ng pagpaparamdam mula sa kanyang anak bago ito namatay.
Ang tanging naaalala na lamang ni Mr. Cielo ay ang dalawang insidente na maaaring naging pangitain sa pagkamatay ng kanyang anak.
Una ay ang pagtatanong niya kay Marky kung mamimigay siya ng mga regalo sa kanyang fans ngayong Pasko.
"Ibig sabihin, sa pagtanong ko sa kanya, alam niyang merong photos pero sinabi niya sa akin wala. Dalawa ang naiisip ko, it's either nag-project na siya ng ganito na wala, o ayaw na lang niya mag-commit na 'may ibibigay ako sa mga fan.'"
