Sarah Geronimo gives impressive performance with Lea Salonga and Regine Velasquez in Perfect 10 concert

Muling pinatunayan ni Popstar Princess Sarah Geronimo na isa siya sa mga pinakasikat na mang-aawit ng kanyang henerasyon nang punuin niya ang Smart Araneta Coliseum para sa kanyang Perfect 10 concert kagabi, November 15, 2013.


"Let’s enjoy this! Kasing dalang ng Halley’s Comet ito," biro ni Lea Salonga nang makasama niya sa entablado sina Sarah Geronimo at Regine Velasquez.

Ang Halley’s Comet—na pinangalanan sa English astronomer na si Edmond Halley—ay isang kometang natatanaw sa kalangitan tuwing 75 hanggang 76 na taon lamang. Huli itong nagpakita noong 1986 at nakatakdang magpakita muli sa 2061.

Bihirang-bihira nga rin namang makita sa iisang entablado ang matinding singers na sina Sarah, Regine, at Lea, kaya nagawa ni Lea ang paghahambing.

Kaya naman tuwang-tuwa ang libu-libo nilang mga tagahanga sa pagselebra ng Perfect 10 concert ni Sarah kagabi, November 15, sa Smart Araneta Coliseum.

Naging akma ang pagkanta nina Lea, Sarah, at Regine ng mga awitin ni Barbra Streisand—tulad ng "People" at "Memory"—para sa ika-10 anniversary concert ng Popstar Princess.

Gabi iyon ng pagbabalik-tanaw ni Sarah Geronimo sa kanyang paglalakbay sa nakaraang sampung taon sa showbiz industry.

Muling pinatunayan ni Sarah sa kanyang concert na isa siya sa mga pinakasikat na mang-aawit ng kanyang henerasyon, matapos niyang mapuno ang Big Dome.

Bago magsimula ang concert, isang panalangin ang inialay para sa mga biktima ng Yolanda, ang tropical cyclone na sumalanta sa Central Visayas noong November 8.

May bahagi rin ng kikitain sa concert ni Sarah na idu-donate sa mga typhoon victims.

JOURNEY TO THE TOP. Sa pamamagitan ng musika ay ikinuwento ni Sarah ang kanyang paglalakbay sa tugatog ng tagumpay—mula sa pagkapanalo niya sa singing competition na Star For A Night noong 2003, hanggang sa maging sikat siyang movie star, kilalang endorser, at tinitingalang performer.

Ibinahagi rin ni Sarah ang kanyang personal na buhay sa pamamagitan pa rin ng musika.

Ang ilan sa mga kanta mula sa kanyang pinakabagong album, na pinamagatang Expressions, ay nagtataglay ng mga personal na mensahe ng kanyang buhay.

Kagaya na lamang ng "Eyes On Fire," na aniya ay tungkol sa "isang pag-ibig na nakakapaso."

ADVERTISEMENT - CONTINUE READING BELOW

Hindi man pinangalanan, tila ang tinutukoy ni Sarah ay ang kanyang naudlot na relasyon kay Gerald Anderson, na kanyang nakapareha sa Catch Me I'm In Love at Won't Last A Day Without You.

CONCERT HIGHLIGHT. Ang pinaka-highlight ng concert ay sunod-sunod na mga pambihirang kaganapang ito: pakikipag-duet ni Sarah kay Regine Velasquez, pakikipag-duet ni Sarah kay Lea Salonga, at ang pagsasama nilang tatlo sa stage.

Kinanta nina Sarah at Regine ang mga awitin ng Fil-Am international singer na si Bruno Mars, ang "It Will Rain" at "When I Was Your Man."

Idolo ni Sarah si Regine Velasquez, at ang Songbird din ang siyang host ng Star For A Night noong 2003 kung saan naging grand champion si Sarah.

Samantala, nakapangingilabot ang rendisyon nina Sarah at Lea ng mga hit songs mula sa Broadway musical na Wicked, ang "For Good" at "Defying Gravity."

Nagkasama sina Lea at Sarah sa The Voice of the Philippines kung saan parehong silang naging coaches, kasama sina Apl.de.Ap at Bamboo.

RACHELLE ANN, MARK, CHRISTIAN. Ang tatlo pang dumalong guest ni Sarah ay sina Rachelle Ann Go, Mark Bautista, at Christian Bautista.

Ani Sarah, itong tatlo ang ilan sa mga totoong kaibigan niya sa showbiz na mapagkakatiwalaan niya.

Sina Rachelle Ann, Mark, at Christian ay dati ring mga kasamahan ni Sarah sa ASAP Champions sa ASAP, ang Sunday noontime variety show sa ABS-CBN.

Sa ngayon ay nasa bakuran ng GMA Network sina Rachelle Ann, Mark, at Christian.

Magandang sorpresa rin ang ibinigay ni Sarah sa kanyang mga fans sa dulo ng concert.

Nang kantahin ni Sarah ang "Forever's Not Enough" ay bumaba na ito sa stage upang puntahan ang mga fans at mga taong nakatulong nang malaki sa kanya, gaya ni Vic del Rosario, ang big boss ng Viva Entertainment na siyang humahawak sa career ni Sarah.

ADVERTISEMENT - CONTINUE READING BELOW

Pagbalik niya sa entablado at pagtungo niya backstage ay namatay na ang mga ilaw at inakala ng marami na tapos na ang concert.

Buti na lang at hindi nag-alisan ang mga tao dahil pagkalipas ng ilang minuto ay muling lumabas si Sarah sa stage at nagpamalas ng dance moves.

SHIRLEY BASSEY, MICHAEL JACKSON. Bukod sa paglalahad ng kanyang pinagdaanan sa nakalipas na isang dekada sa showbiz, nagsilbi ring tribute ni Sarah Geronimo ang concert sa kanyang mga iniidolong musical influences.

Sa isang punto ng concert ay sinabi ni Sarah na malaki ang naging impluwensiya sa kanya ni Shirley Bassey, isang singer na naging tanyag noong 1950s at 1960s, at nagpasikat ng mga kantang gaya ng "Climb Every Mountain" at "Goldfinger."

Madamdamin din ang naging rendisyon ni Sarah ng "This Is My Life," na isa pang pinasikat na kanta ng Welsh singer na si Shirley.

Inilahad din ng Popstar Princess ang kahalagahan ng awiting "To Love You More" ni Celine Dion para sa kanya.

Bukod sa ito ang kanyang naging winning piece nang itanghal siya bilang grand champion sa Star For A Night noong 2003, ikinuwento ni Sarah na ang kanta ring ito ang pinag-aralan niyang maigi at isinapuso, dahil alam niyang panonoorin siya ng kanyang "crush" sa isang pagtatanghal noong nasa high school pa siya.

Sa dulo ng kanyang concert, nagpamalas si Sarah ng kanyang husay sa pagsayaw at nagpakita ng mga Michael Jackson dance moves.

Nang pumanaw ang King of Pop noong 2009, isa si Sarah sa mga naging emosyunal kapag nai-interview.

Ani Sarah noon, pangarap niya na makasama sa isang stage si Michael at hinahangaan niya ang international performer dahil sa pambihirang kakayanan nito na makipag-connect sa audience sa bawat pagtatanghal nito.


WE RECOMMEND


FROM THE SUMMIT MEDIA NETWORK


SPONSORED CONTENT


COMMENTS

Loading comments

THIS JUST IN