Sa bagong programa ng dating Wish Ko Lang host na si Vicky Morales na Ilaban Natin 'Yan!, maghahanap sila ng mga indibiduwal na nasa gitna ng pagtatalo at sisikaping pagkasunduin ang mga ito.
Katulad ng nahanap nilang nagbabangayang magbiyenan sa isang baranggay para sa kanilang unang episode na may titulong "Manugang," paghaharapin at susubukan ni Vicky na resolbahin ang di-pagkakasundo ng mga ito.
Pero kung hindi man magkasundo, ani Vicky, "At the very least, ang gusto kong mangyari, is for them to talk to each other respectfully. Kasi pag may respect, pag pag-asa pa yung makikipagbati sila sa isa't isa."
Bukod sa ipapakitang paghaharap ng di-magkasundong magbiyenan, may reenactment pa ng kanilang situwasyon kung saan gaganap sina Jaclyn Jose, Thea Tolentino, Faye Lorenzo, Anjo Damiles, at Kevin Sagra.
Gagampanan ni Jaclyn ang role ng biyenan na may anak na dalawang lalaki (Anjo at Kevin) na hindi kasundo ang mga manugang na sina Thea at Faye.
Kasama ni Vicky sa bagong programang ito ng GMA-7 sina Gladys Reyes at Cai Cortez.
Mapapanood ang unang episode ng Ilaban Natin 'Yan! mamayang hapon sa GMA-7, alas-4:30 nang hapon.
May alam ba kayong puwedeng pagkasunduin ni Vicky?
