Pumirma muli ng kontrata ang "Majestic Superstar" na si Maja Salvador sa TV5 nitong Abril 5, Martes, sa Studio 4, ng TV5 Media Center, Reliance St., Mandaluyong City.
Nang araw na iyon, eksaktong isang taon mula nang umere ang teleserye ni Maja sa Kapatid Network na Niña Niño.
Nalalapit na ang pagtatapos ng nasabing teleserye, at pumirma ng kontrata si Maja para sa gagawing weekly sitcom, at panibagong teleserye.
Present sa contract signing si Robert P. Galang (RPG), ang Cignal at TV5 President at CEO; pati ang Crown Artist Management (CAM) Chief Executive Officer Rambo N. Ortega; at Chief Operating Officer Mikki Gonzalez.
Maja (seated) with CAM Chief Executive Officer Rambo N. Ortega, CAM Chief Operating Officer Mikki Gonzalez, and Cignal and TV5 President aand CEO Robert P. Galang.
“After Niña Niño, first ever po ay magkakaroon po ako ng sitcom,” masayang pagbabalita ng Majestic Superstar.
“Ahhm, nag-start iyan sa Niña Niño, and then, ahmm my good friend, good friend naming si Pooh, nasa bahay namin, tapos sila ni Rambo, nag-uusap.
“And then, yung sitcom po na ito ay concept ni Rambo, and then tinulungan siya ni Pooh para mabuo.
“And after that, of course, may good relationship tayo with our Cignal family and TV5 family, with RPG.
“So, nag-present kami, and then nagustuhan nila yung concept. So, eto na yun, mangyayari na.
“Ahhm, sobrang laking project nito for me dahil first time ni Crown Artist Management na magla-line produce. Ang line producer ay si Crown.
“So, it’s a partnership with Crown Artist Management and Cignal-TV5.”
UPCOMING PROJECTS WITH TV5
Hindi pa masyadong makapagbigay ng details si Maja kaugnay sa weekly sitcom niya, at sa susunod niyang teleserye sa Singko.
“Sobrang excited ako sa teleseryeng yun dahil physically, mentally, emotionally kailangan prepared ako!” bulalas ng aktres.
“Isa akong performer dun… pero hindi basta-basta performer.
“Dalawa ang partner ko dito. Yung isa, medyo naka-work ko na — puwedeng nag-guest sa Niña Niño.”
Second or third quarter ng taon ang taping ni Maja para sa sitcom. Inaasam ng Majestic Superstar na maumpisahan ang taping ng bago niyang teleserye sa huling quarter ng 2022.
“Yung serye, mas mahuhuli because kailangan ko po talagang mag-training dahil hindi ito basta-basta.
“I think isa ito sa magiging malaking teleserye ng Cignal at ng TV5,” lahad ni Maja.
Posible ring gumawa ng pelikula si Maja sa Cignal Entertainment by fourth quarter din of 2022, or early next year.
“Parang sinasabi ni RPG, ‘Bawal mag-relax!’ Ha! Ha! Ha! Ha!” pagtawa niya.
“Yun, siguro ang ganda lang talaga ng partnership with Cignal, and of course with TV5. And yun nga, gaya ng sinabi ni RPG, magaan lang talaga.”
Gaano siya ka-excited sa sunud-sunod niyang projects sa Cignal at TV5?
“Sobra! Kasi, iba-ibang genre. Tapos, challenging yun for me dahil iba-ibang genre, so kailangan hindi pare-parehas, di ba?” paliwanag ng premyadong aktres.
“And ang pinaka-excited talaga ako ay… wala pong OA, kundi… hindi po OA… OA na kung OA pero yung teleserye talaga.
“It’s the same team, with Direk Thop Nazareno.”
MAJA ON EAT BULAGA
Sa dami ng proyektong naka-line up kay Maja sa TV5, puwede pa ba siyang mag-guest sa Eat Bulaga! ng GMA-7?
“Opo! Very supportive! Very supportive si RPG,” mabilis na tugon niya.
Bukod sa mga project niya, pinagkakaabalahan din ni Maja ang pagma-manage ng artists sa CAM.
Ibig bang sabihin, for the rest of the year ay malabo pa talaga na magpakasal sila ni Rambo, magka-baby, o kahit ma-engage man lang?
Natawa si Maja, “Pag dadating po, dadating. Hindi ko rin po alam, e. Huwag din naman nating tanungin ngayon si Rambo!
“Kumbaga, kung mangyayari po, mangyayari. And yun, ever since naman simula nang maging kami, hindi naman namin ipinagdamot ni Rambo yung story namin.
“So, kung mangyayari po, huwag kayong mag-alala…”
Ipapaalam din agad nila sa press at/o publiko sakaling engaged na sila?
“Huwag po kayong mabibigla pero ahhhm… siyempre po,” sabi ni Maja.
“Siyempre, iche-cherish yun for sure. Baka puwedeng i-give niyo sa amin… feel na feel ko naman na sumagot ako, ‘no?!
“Iche-cherish namin and of course, di ba, tulad ng sinabi ko, hindi naman kami madamot.
“So… wala pa pong singsing. Singsing ko 'yan! Hindi pa nga 'yan bayad, charot!” pagmumuwestra ni Maja.
'“Pero… in time. Ipagdasal po natin yan.”
Hindi naka-specify sa kontrata niya na bawal muna ang kasal or baby this year dahil sa dami ng gagawin niyang programa?
“Wala! Si RPG pa nga yung nangungulit, e!”