Pinag-uusapan ngayon sa social media ang isang pulis sa Cavite na nagbahagi ng open letter para kay Senator Manny Pacquiao.
Inabutan daw kasi siya ng pera ng mambabatas kahit ang nais lamang niya ay magpa-selfie sa People’s Champ nang magkita sila sa Dasmariñas, Cavite, noong November 27.
Namudmod ng tig-iisang libong piso si Pacquiao sa mga residente ng Dasmariñas na labis naapektuhan ng pandemya at mga kalamidad na dumaluyong sa bansa.
Isa si Police Corporal Carlo Romero sa namahala sa seguridad ng senador.
Nang patapos na ang event, lumapit si Romero kay Pacquiao upang magpa-selfie.
Pagkatapos nito, inabutan ng senador ang police officer ng pera na natira sa mga ibinahagi niya sa mga tao.
Hindi inakala ni Romero na malaki-laking halaga ang inabot sa kanya ni Pacquiao.
Ngunit sa halip na gastusin para sa kanyang saili, ginamit niya ito upang ipambili ng mga grocery na idu-donate sa mas labis na nangangailangan.
THE OPEN LETTER
Sa pamamagitan ng Facebook, ibinahagi ni Romero ang kanyang pasasalamat sa mambabatas sa pagiging mapagbigay nito.
Mensahe ni Romero sa kanyang open letter kay Pacquiao: "Sir Manny Pacquiao, ako nga po pala yung Pulis na nagpakuha ng picture sa inyo kahapon sa Dasmarinas Cavite. (November 27, 2020).
“Nagulat po ako dahil pagkatapos natin magpakuha ng picture ay inabot nyo sa akin ang natirang pera sa mga ipinamamahagi ninyo at nung bilangin ko ito ay mas lalo akong nagulat.
“Ang nais ko lang po talaga ay magpakuha ng picture kasama kayo, hindi ko po inaasahan na ibibigay nyo ang ganun halaga sa akin.”
Dahil may maayos naman siyang trabaho, naisip ni Romero na mamili ng groceries upang i-repack bilang relief goods.
“Kaya eto po, bilang pasasalamat po sa inyo ay ibinili na rin po namin ang halagang inyong ibinigay ng mga bigas, de lata, kape at noodles upang maipamahagi po sa mga mahihirap nating kababayan, alam ko po mas marami pa po ang lubos na nangangailangan nito kesa po sa amin.
“Maraming Salamat po sa inyo. Sana po mabasa nyo itong post ko at sana rin po ma-meet ko pa ulit kayo.
“God Bless sir! Salute"
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika
