Bongga, sosyal, at engrande ang GMA Thanksgiving Gala na kasalukuyang ginaganap sa Shangri-La The Fort, Manila, BGC, Taguig City, ngayong Sabado ng gabi, July 30, 2022.
Pero ang nakaagaw sa atensiyon ng karamihan ay ang kasuotan ng singer-actor na si Mark Bautista.
Para siyang hari—na kulang na lang ay korona—sa kanyang Michael Cinco outfit.
Sigaw pa nga ng host ng red-carpet event, “I feel like the king just entered!”
Natatawa namang pag-amin ni Mark, “Mabigat siya but happy ako.”
Pero kailangan daw talagang suotin niya ang magarbong kasuotan dahil ibiniyahe pa ito mula Dubai, United Arab Emirates para sa espesyal na okasyon ng Kapuso Network.
Saad ng All-Out Sundays mainstay, “This is Michael Cinco, kaya kailangan ko suotin lahat kasi from Dubai to here.”
Ang tinutukoy niyang lahat ay ang tila kapa na nakapatong sa kanyang tuxedo.
Dagdag pa niya, “Pero mamaya, i-retain ko na yung sa ilalim na [damit], ‘pag party-party na, just for the red carpet and all.”
Sa nasabing gala ng GMA, hindi magpi-perform si Mark, kaya nais lamang daw niyang i-enjoy ang palabas.
Aniya, “Im just going to relax, no pressure, I’m just going to enjoy the entire show.”
Ang GMA Thanksgiving Gala ay itinaon sa ika-72 taong anibersaryo ng Kapuso Network sa television industry.
