Isa sa ipinagmamalaking naipundar ng single mom na si Sunshine Cruz sa pagpasok ng taong 2023 ay ang kanyang bagong bahay.
Base sa ilang mga larawang ibinahagi ni Sunshine sa kanyang social media accounts, mas malaki ito sa bahay niya sa may Parañaque rin.
Read: Sunshine Cruz: Queen of her house...and of her life!
Katas daw ito ng walang kapaguran niyang pagtatrabaho.
Paliwanag ni Sunshine kung bakit nag-upgrade siya ng bahay, “Nag-upgrade ako because of my kids too. Kasi yung carpark sa old house, isa lang.
“Yung isang anak ko nag-aaral, may student’s license na, nag-aaral na magmaneho.
"Yung isa din mag-aaral na kasi magtu-twenty na rin. So, kailangan namin ng more space na maka-parking ng sasakyan, at least two or three. Kasi kawawa yung kotse, nasa labas lang.”
May tatlong dalagang anak si Sunshine sa dating mister na si Cesar Montano — sina Angelina Cruz, Sam Cruz, at Chesca Montano.
Dagdag pa ni Sunshine, “Yung isang sasakyan namin, nababangga ng mga garbage truck, ng mga lasing sa kalsada.
“So, yun yung ano ko, for safety, and at the same time parang mas ano lang, mas may security ba.”
Kasalukuyan pa ring naglilipat sina Sunshine ng mga gamit sa bagong bahay nila, pero hindi pa raw tapos.
Kailangan daw kasi nilang piliin ang mga kailangang iwan sa lumang bahay dahil ibebenta rin niya ito.
Anong pakiramdam na natatamasa na niya ang bunga ng kanyang pinaghihirapan?
Sagot ni Sunshine, “Masarap na mahirap. Pero siyempre, something new, something different. Pati yung mga dogs ko excited, bagong environment.
“Masarap yung feelings na kahit papano, yung pagtatrabaho natin nasusuklian.”
Malaki raw ang pasasalamat niya sa lahat ng nagtitiwala sa kanya at nagbigay ng oportunidad upang siya ay makapagtrabaho.
Aniya, “Nakakatuwa and siyempre grateful kasi, sabi ko nga, napakabihira sa kaedaran ko na dire-diretso ang trabaho since 2013, dire-diretso.
“Mawawalan man ako ng project, wala pang three months, dire-diretso talaga. It’s a way also para makaipon ako at makapagpatayo ng bahay at mabigyan ko kahit papaano ng kumportableng buhay yung mga anak ko.”
Eksklusibong nakapanayam ng PEP.ph (Philippine Entertainment Portal) si Sunshine sa birthday party ng asawa ni Ara Mina na si Dave Almarinez, sa Top of the Alpha Events Place, Makati City, kamakailan.
NO HARD FEELINGS
Isa raw sa naging susi sa tagumpay ni Sunshine ay ang hindi niya pagtatanim ng sama ng loob sa mga taong nakasakit sa kanya.
Pero nakaramdam man daw siya ng galit ay kaagad naman din itong naghilom.
Dagdag niya, “Siyempre, nagagalit din tayo. Sumasama din ang loob natin pero hindi kailangan patagalin kasi, at the end of the day, ikaw din ang magsa-suffer, e, kapag may tinik ka sa dibdib.
“I don’t know. For me kasi, parang kumbaga, ang sugat nga gumagaling, so yung sama ng loob mo, eventually mapapalitan ng pagiging grateful yan at pagiging thankful sa mga opportunities o sa mga dumadating sa yo na biyaya.
"Hindi lang naman pera, hindi lang trabaho, but most especially, you are healthy, your mom is healthy, your children are healthy, yun yung sa akin, e.
“Na bakit kailangang mag-focus ka sa galit, bitterness, kalungkutan, when mas maraming maganda kung mag-focus sa magagandang nangyari sa buhay.”