Nagsama-sama ang ilan sa pinakamalalaking artista ng ABS-CBN para sa All-Star Games 2019 na ginanap sa Smart Araneta Coliseum nitong Linggo, August 25, 2019.
Naging mainit ang labanan ng Team Jerome at Team Elmo (basketball), Team Julia at Team Kim (volleyball), at ang pinakahihintay na Main Game ng Team Vice/It's Showtime at Team Gerald/Daniel (basketball).



Bukod sa mismong games sa hardcourt, mas lalong nagpakulay sa friendly games na ito ang ilang sidelights na nasaksihan ng mga nanood sa Big Dome.
KILIG MOMENTS
Pinakilig ng rumored couple na sina Vice Ganda at Ion Perez ng Team Vice ang audience.

Matapos kasing maka-three points ni Ion ay biglang tumakbo si Vice sa court para yakapin ang rumored boyfriend.
May pagkakataon pang magka-holding hands sila habang nagdi-dribble ng bola si Ion.

Bagamat sa huling interview ni Ion ay sinabi niyang magkaibigan lang sila ni Vice.
Agaw-eksena rin ang flying kiss ni Xian Lim sa kasintahang si Kim Chiu bago mag-service ang aktres bilang good luck.
Kinilig naman ang lahat ng nasa Araneta habang tinutugtog ang "Ikaw Nga Ba Si Mr. Right?" ni Kim.

Dumalo rin sa All-Star Games si Kathryn Bernardo para sumuporta kay Daniel Padilla at may pa-good luck kiss pa ito backstage.

FUNNY AND ACTION SCENES
Palakpakan din ang audience nang maka-three points si Ryan Bang.
Dahil sa tuwa ng mga taga-It's Showtime ay nilapitan nila si Ryan at hinubaran ito hanggang sa mapunit ang jersey niya.


Ang tanging trabaho ni Ryan Bang sa court ay bantayang mabuti si Gerald Anderson na ikinalilito naman ni Gerald.

Medyo mainit ang lababan ng Team Vice at Team Gerald na naging dahilan ng magtamo ng sugat sa bandang kilay si Zanjoe Marudo pagkatapos siyang tamaan ni Eric Tai ng It's Showtime.

Sa 4th Quarter ng basketball game sa pagitan ng Team Gerald/Daniel at Team It's Showtime ay pinasok si Vice Ganda.
Palakpakan ang lahat nang maka-shoot ito mula sa free throw line dahil na-foul siya ni Daniel Padilla.

THE WINNERS
Sa huli ay nagwagi ang Team Jerome laban sa Team Elmo, ang Team Kim laban sa Team Julia, at Team Gerald/Daniel laban sa Team It's Showtime.




