Nagtataka si Christian Bautista kung bakit pilit na pinag-aaway sila ng kapwa singer niyang si Jed Madela. May intriga pang ayaw daw nilang magsama sa isang dressing room sa Sunday variety show nila sa Dos na ASAP XV.
"Hindi ko talaga alam kung saan nanggaling 'yan. That is the stupidest issue in the world. We have worked together for so long tapos magkakaroon ng isyu na gusto kong lumipat ng dressing room because of Jed. That is just so weird. Sino ang gumawa noon, alam mo yun?" bulalas ni Christian nang ma-interview siya ng PEP (Philippine Entertainment Portal) sa presscon ng Ink All-You-Can na ginanap kahapon, January 29, sa Max's Restaurant sa Sct. Tuazon, Quezon City.
"Wala, wala, walang professional jealousy," mariin pang pagtatanggi ni Christian. "Pero, of course, within that dressing room, how many singers do we have? We have six singers and we're all friends. Pero we know na kaming lahat, in the same way na paglabas namin ng ASAP, we are competitors. We are competing with each other pero we are good friends. Pero huwag mo na lang dalhin yun sa pagkakaibigan niyo o sa dressing room. Walang ganun."
Napag-usapan na raw nila ni Jed ang mga lumabas na intriga. "Sabi namin, 'Let us just really support each other. We are in the same label [Universal Records]. Thank you so much for welcoming me into this label. And I will do my best also to support you in all your endeavors.'"
AIMING FOR THE TOP. Hindi kaya nai-insecure si Jed sa ibinibigay na atensyon ng Universal Records kay Christian dahil nag-double platinum ang album niya na Romance Revisited: The Love Songs of Jose Mari Chan?
"I don't know. I can't answer that," sagot ni Christian. "Basta I know his album is 2009's Best OPM Album, right?"
Pero, "definitely since UR na ako, mas naging close kami actually ngayon. Kasi before, yun nga, magkaibang kumpanya kami. Tapos ngayon mas nagkikita kami sa mga Universal events."
Ang tanging maaasahan ni Jed sa kanya ay, "I'll support your album. Hope you'll release your new album soon."
Gayunpaman, deretsahang sinagot ni Christian ang tanong kung ambisyon ba niyang kilalaning biggest recording star ng Universal Records.
"Yeah!"
INDONESIAN LOVE SONG. Ayaw nang paapekto ni Christian sa mga intriga. Sobrang dami raw ng blessings na dumarating sa kanya para intindihin pa niya ang negative issues. Dahil nga sa goal niyang i-conquer ang Asian music scene, malamang daw na magpabalik-balik siya sa Indonesia, bukod pa sa pagso-show sa ibang bansa.
Gano'n na lang ang pagko-concentrate si Christian sa Indonesia dahil ire-release by February doon ang Romance Revisited album niya kung saan may mga kanta siya sa wikang Bahasa ng Indonesia. Sa Valentine's Day nga, February 14, ay nasa Jakarta siya to do a big concert.
"Pero sa mga Pinoy fans ko, don't worry, kasi mauuna naman akong magkaroon ng concert sa Dumaguete, kasama ko si Karylle, sa February 12."
May offer din daw sa kanya na isang soap sa Indonesia. Pero ayon kay Christian, tatanggapin lang niya ito kung bihasa na siya sa Bahasa.
Bukod sa magandang music career, product endorser din si Christian. Ang latest endorsement niya nga ay ang Ink All-You-Can bilang first celebrity endorser ng ink refilling franchise. Bagay na bagay daw kay Christian ang bagong campaign nitong Go Unlimited dahil unlimited din daw ang talent at versatility ng singer, actor, at entrepreneur.