Robin Padilla gives up Toda Max to concentrate on three movies

Ipinaliwanag ni Robin Padilla kung bakit hindi na siya napapanood sa weekly sitcom ng ABS-CBN na Toda Max. Ayon sa action star, tatlong pelikula ang sabay-sabay niyang ginagawa ngayon kung kaya’t kailangan niya munang magpaalam sa sitcom nila nina Vhong Navarro at Angel Locsin.


Nagsalita na sa wakas si Robin Padilla sa dahilan kung bakit hindi na siya napapanood sa sitcom niya sa ABS-CBN na Toda Max.

Sa panayam niya sa abs-cbnnews.com ngayong araw, June 20, sinabi ng action star na hindi naman niya basta tinalikuran na lang ang show. Nagpaalam daw siya kay ABS-CBN Channel Head Cory Vidanes dahil sa mga ginagawa niyang pelikula.

Imposible raw kasi na makapag-taping pa siya sa sitcom dahil tatlo ang pelikulang kanyang ginagawa sa kasalukuyan.

Saad ni Robin, “Sa mga oras na ito, tatlong pelikula po ang ginagawa natin. Sa abroad po ang taping.

“Hindi naman po natin [puwedeng] pilitin sila Vhong [Navarro] at Angel [Locsin] na mag-advance taping dahil sa akin.

“Ako po ay maayos na nagpaalam kay Cory Vidanes.”

Nilinaw rin ni Robin na hindi niya basta-basta iiwanan na lang ang show dahil mahalaga ito sa kanya, pati sa samahan nila ng kapwa niya mga bida sa show.

Aniya, “Ang Toda Max ay mahal ko iyan.

“Naging medium ko iyan para masabi ko yung mga bagay na nakatago sa puso ko sa larangan ng komedya na hindi masyado masakit.

“Diyan ko dinadaan ang aking pagiging makabayan. Pati ang aking mga t-shirt, diyan ko inilabas.”

Umaasa naman daw siya na makakabalik pa sa sitcom kapag natapos na lahat ng kanyang mga pelikula.

“Masyado po lang akong maraming ginagawa ngayon.

“Ako po ay wala na sa edad na puwede nating sabihin na hindi na hanapbuhay kundi hanap-patay.

“Ngayon ay kailangan enjoy-in ko ang asawa ko, ang mga anak ko.

“Kung nagtatrabaho tayo, dapat balance.”



10000 HOURS. Nagpahayag naman ng kasiyahan si Robin na isa ang kanyang pelikula sa napasama sa Metro Manila Film Festival (MMFF) ngayong taon.

Matatandaang noong Martes, June 18, ay inanunsiyo na ni MMDA Chairman Francis Tolentino ang walong opisyal na kalahok sa MMFF 2013.

Kabilang na nga rito ang 10000 Hours, ang isa sa tatlong pelikulang ginagawa ni Robin.

ADVERTISEMENT - CONTINUE READING BELOW

(Read: 39th Metro Manila Film Fest entries revealed)

Masaya raw si Robin dahil muli siyang makakagawa ng isang action movie.

Sa 10000 Hours, gagampanan ni Robin ang role ng isang pulitiko na bigla na lang nagtago sa awtoridad dahil sa mga akusasyong ibinibintang sa kanya.

“Sampung libong oras akong nagtago. Ako’y isang senador dito at napagbintangan siya.

“Yung 10,000 hours, yun yung mga oras na siya’y nagtago, hinabol, at nakabalik.

“Matindi ito. Habulan ito sa Europe.

“Siguro ngayon pa lang magkakaroon ng ganitong klaseng pelikula at ang punta ho namin sa Amsterdam, sa Eastern Europe.

“Matindi ito. Ang mga kaupakan ko dito, mga puti.”

Ayon pa kay Robin, magsisilbi rin daw itong reunion project nila ni Direk Joyce Bernal na nakasama niya noon sa Viva Films.

“May lihim na pag-ibig kami sa isa’t isa ni Bb. Joyce.

“Matagal na naming pangarap ito.

“Nag-uumpisa pa lang kami sa Viva noong araw, gusto na naming gumawa ng ganung action.

“Pinagpala naman kami ng Panginoon na matuloy ito.”

Samantala, pinabulaanan naman ng mister ni Mariel Rodriguez na mas pinaboran niyang gawin ang 10000 Hours sa pelikulang Sa Ngalan ng Ama, Ina at Mga Anak, na ipo-produce ng kapatid ni Robin na si Rommel Padilla.

Ang nasabing pelikula ay isa sa mga isinumite sa MMFF committee ngunit hindi nakasama sa Magic 8.

Sabi ni Robin, “Hindi [ko ito mas pinili]. Isusumpa ako ni utol kasi si Kuya Rommel ang producer noon, e.

“Ako’y naghugas ng kamay dito.

“Nung ipinasa ang script ng Sa Ngalan Ng Ama, nagdasal lang ako na kung sinong matatanggap, yung ang sa palagay ko sa kanya pinagpala.”


WE RECOMMEND


FROM THE SUMMIT MEDIA NETWORK


SPONSORED CONTENT


COMMENTS

Loading comments

THIS JUST IN