Ai-Ai delas Alas, other celebs post messages of love for director Wenn Deramas

Patuloy ang pagbuhos ng pakikiramay ng mga artista dahil sa pagpanaw ng blockbuster director na si Direk Wenn V. Deramas.

Pumanaw si Direk Wenn ngayong umaga ng Lunes, February 29, dahil sa cardiac arrest.

Ilan pa sa mga artistang nag-post ng kanilang pakikiramay sa social media ay ang mga nakatrabaho niyang sina Ai-Ai delas Alas, Eugene Domingo, Luis Manzano, Derek Ramsay, at Heart Evangelista.

Simple lamang ang post ni Ai-Ai para kay Direk sa kanyang Instagram.

“Mahal kita” ang tanging caption ng Comedy Queen sa kanyang post na naglalaman ng “Rest in peace.”

Maraming pinagsamahan sina Ai-Ai at Direk Wenn bilang magkatrabaho at magkaibigan.

Si Direk Wenn ang naging direktor ni Ai-Ai sa ilan sa kanyang blockbuster films, kabilang na ang hit movie franchise na Ang Tanging Ina.

Samantala, naugnay ang dalawa sa isyung may kinalaman sa MMFF 2015 kung saan pareho silang may entries.

Si Direk Wenn ang direktor ng Beauty and the Bestie na pinagbibidahan nina Vice Ganda at Coco Martin, samantalang kasama ni Ai-Ai sina Vic Sotto, Maine Mendoza, at Alden Richards sa My Bebe Love.#KiligPaMore

Sa isang interview ay sinabi ni Ai-Ai na hindi siya naniniwalang number one sa takilya ang Beauty and the Bestie, kontra sa claim ng kampo ng Star Cinema.

Read: Ai-Ai delas Alas refutes Star Cinema’s No.1 claim in the MMFF box-office race

Sa isang ulat ng PEP makalipas ang ilang araw, sinabi ni Direk Wenn na magkalaban man ang pelikula nila ni Ai-Ai, hindi kailangang madamay ang pagkakaibigan nila dahil sa kumpetisyon sa pelikula.

Pahayag ni Direk Wenn sa nasabing ulat: "Direktor ako, artista siya dun sa kabila. And let's face it, ang MMFF ay kumpetisyon.

"Kumpetisyon namin pare-pareho, kaya hindi dapat madamay ang friendship sa professional namin pagdating dito kasi matatapos yun."

Read: Wenn Deramas hurt by Ai-Ai delas Alas' insinuations

OTHER MESSAGES. Nag-post din ng mensahe si Eugene Domingo para kay Direk Wenn.

Bukod kay Ai-Ai, isa pang madalas nakatrabaho at kaibigan ni Direk Wenn si Eugene, na kasama rin sa lahat ng Tanging Ina movies.

Pinasalamatan ni Eugene si Direk sa kontribusyon nito sa industriya at sinabing mami-miss niya ang direktor araw-araw.

Inisa-isa naman ni Luis Manzano ang mga proyektong pinagsamahan nila ni Direk Wenn, kagaya ng Kampanerang Kuba, Dyosa, Mga Paa ni Isabela, Ang Cute ng Ina Mo, Hating Kapatid, Petrang Kabayo, Who's That Girl, This Guy's in Love With U Mare, Moron 5, at Moron 5.2.

Ani Luis, isa si Direk Wenn sa mga nagtiwala sa kanyang kakayahan at kakulitan.

Mensahe naman ng pasasalamat at pagmamahal ang ipinost ni Derek Ramsay sa kanyang Instagram account.

Nagkatrabaho sina Direk Wenn at Derek sa pelikulang The Unkabogable Praybeyt Benjamin.

Nagpasalamat din si Heart Evangelista kay Direk Wenn.

Nakatrabaho ni Heart si Direk Wenn sa Ang Tanging Ina.