Ikinalungkot ng mga kaibigan at followers ng mag-asawang Patrick Garcia at Nikka Martinez ang balitang nalaglag ang ipinagbubuntis ng misis ng aktor.
Una ay nag-alala ang mga nakakita ng malungkot na larawang ibinahagi ni Nikka sa Instagram kahapon, March 6, kunsaan mahigpit siyang kayakap ng Langit Lupa actor.
Ang tanging caption lamang nito ay “ILYSB,” na acronym para sa “I love you so bad.”
Sa comment section ay malungkot na ibinahagi ni Nikka na nagkaroon siya miscarriage sa dapat sana'y ikatlong anak nila ni Patrick.
Sa kanyang Instagram account, ipinakita naman ni Patrick ang suportang ibinibigay niya sa asawa sa gitna ng pagsubok na pinagdaraanan nila ngayon.
Ang simpleng mensahe ni Patrick: “Everything is gonna be ok..”
Sa comment ay sinagot din ni Nikka ang ilang nagtanong kung ano ang nangyari sa kanya.
May dalawa nang anak sina Patrick at Nikka; sina Chelsea at Patrice.
Mayroon ding anak ang Kapamilya actor sa dati niyang girlfriend na si Jennylyn Mercado, si Alex Jazz.
