Masaya at nasa maayos na kalagayan ngayon ang aktres na si Ellen Adarna.
Ito ang rebelasyon ng manager ni Ellen na si Pia Campos sa ABS-CBN News kagabi, November 20.
Ayon sa ulat ni Mario Dumaual, sinabi ni Pia na si Ellen ang dapat magsalita kung may aaminin o pabubulaanan ito tungkol sa lumabas na balita.
Saad ng manager ng sexy star, “At the moment, I can assure you that Ellen is well and happy.
"And if there are rumors to be admitted or dispelled, it’s her story to tell when she is ready to do so."
May nakausap din daw si Mario na isang source na malapit sa aktres.
Sinabi ng source na ito na ang kumpirmasyon tungkol sa pagbubuntis ni Ellen ay depende raw sa contract obligations ng aktres na magtatapos sa katapusan ng 2017.
Nakasaad daw sa endorsement contracts ni Ellen ang clause na bawal magbuntis ang isang babaeng endorser sa loob ng panahon ng kontrata.
Nitong nakaraang Sabado, November 18, eksklusibong inilabas ng PEP.ph (Philippine Entertainment Portal) ang balitang nagdadalantao si Ellen, at si John Lloyd Cruz ang ama ng kanyang dinadala.
Hanggang ngayon, parehong tahimik ang dalawa tungkol sa balitang ito.