Hindi nagpatinag ang ABS-CBN actress na si Jessy Mendiola matapos punahin ng isang netizen ang kanyang mas payat na pangangatawan.
Kamakailan ay nag-post si Jessy sa Instagram ng larawan, kung saan kitang-kita ang bunga ng kanyang pagwu-workout.
Pero sa comments section, sinabi ng isang netizen na mas maganda raw si Jessy noon kumpara ngayon.
Sabi ng netizen, sobrang payat daw ng girlfriend ni Luis Manzano at baka raw stressed ito.
Sumagot naman ang Kapamilya actress at sinabi nitong mas masaya siya ngayon sa kanyang figure.
“Mas masaya naman ako ngayon. Ok na yun. Quits lang. kalma ka,” sabi ni Jessy.
Ipinagtanggol naman ng ibang netizens si Jessy at sinabing marahil ay naninibago lang ang ilan sa bago nitong pangangatawan.
Dapat din daw maging masaya na lang ang mga ito dahil hindi biro ng fitness transformation na ginawa ni Jessy.
Nakaranas ng matinding pambabatikos at body-shaming si Jessy nang tanghalin siyang Sexiest Woman ng FHM Magazine noong 2016 dahil sa mas malaki niyang pigura noon.