Magbabalik-telebisyon na ang dating child actor na si CJ Ramos ilang araw matapos makalabas sa Caloocan City Police Station jail noong August 9, 2018.
Sa post niya sa kanyang bagong gawang Instagram account kahapon, August 15, ibinahagi ni CJ ang larawan niya kasama ang bida ng FPJ’s Ang Probinsyano na si Coco Martin.
Sabi niya sa caption: "Boss #cocomartin #cjramos #angprobinsyano #blessings #secondchance #thankful #salamatbosscoco @mr.cocomartin.”
Ang prime-time series ng ABS-CBN ay halos tatlong taon nang umeere at nagiging comeback vehicle ng mga artistang matagal na nawala sa sirkulasyon.
Nakulong ng ilang araw si CJ matapos mahuli ng pulisya sa isang buy-bust operation sa may Tandang Sora, Quezon City, noong July 31.
Ayon sa ina niyang si Connie Ocampo, pumayag na si CJ na magpa-rehab sa isang private facility kapag nakalaya na ito.
Sabi naman sa half-brother niyang si Sherwin Ordoñez, baka abutin ng anim hanggang siyam na buwan ang rehabilitation process ni CJ.
Kasalukuyang nakikipag-ugnayan ang PEP.ph (Philippine Entertainment Portal) sa kampo ni CJ upang makakuha ng karagdagang detalye ukol dito.