Masasaya ang mukha ng pamilya ni Ellen Adarna sa kanilang Christmas photo na ipinadala ng isang PEP.ph source kagabi, December 25.
Sa larawan, makikitang nakapula ang karamihan sa mga kapamilya ni Ellen habang nakatingin sa camera.
Sa isang Boomerang video, na ipinadala rin ng PEP.ph source, ang caption ay: “Merry Christmas from the Adarna fam!!”
Kapansin-pansin namang wala ang partner ni Ellen na si John Lloyd Cruz sa larawan.
May dalawang baby boy sa larawan, ngunit hindi pa rin matukoy kung sino sa kanila si Elias Modesto, ang anak nina Ellen at John Lloyd.
Matatandaang kasama si John Lloyd sa Adarna family picture na kuha nitong huling New Year, na nailathala rito sa PEP (Philippine Entertainment Portal) nung January 4, 2018.
Kasama pa sa family portrait noon ang ama ni Ellen, si Alan Modesto Adarna, isang successful businessman na nagmamay-ari ng Queensland, isang motel empire na sinimulan ng kanyang ama at lolo ni Ellen na si Federico.
Masasabing empire ito sapagkat mula sa Cebu, nag-branch out na ito sa Davao, Cagayan de Oro, at pati na sa Metro Manila.
Namatay ang ama ni Ellen nito lamang June 3, 2018.
Nitong nakaraang December 22, isang celebrity nail artist ang nag-post ng larawan nila ni Ellen, kasama ang anak ni Ellen na si Elias Modesto, ngunit nakatalikod sa larawan ang baby.
Hanggang ngayon ay nananatiling mailap sa media ang dalawang showbiz personalities matapos nilang iwan ang limelight may halos dalawang taon na ang nakaraan.
