Benta sa netizens ang sariling sikap na “official” 2023 calendar na ginawa ng isang binata mula sa Taytay, Rizal.
Noong December 29, 2022, ipinost ng photographer na si Arrick Dylan Paras, 23, ang kanyang sariling gawang kalendaryo.
“Ang ating official calendar ng 2023!” caption ni Arrick kalakip ang kuha ng ipinagawa niyang kalendaryo, kung saan makikita ang kanyang topless photos.
Itinampok ang calendar na ito ni Arrick sa Facebook account ng isang news media outlet at ni-repost ng mga kakilala ni Arrick sa social media.
Halata mang para sa katuwaan, may maganda at malalim na dahilan si Arrick kaya niya naisipang i-push ang ideyang ito.
INSPIRATION BEHIND SEXY 2023 CALENDAR
Mistulang killing two birds with one stone ang intensiyon ni Arrick sa ipinagawang A4-sized calendars.
Una, remembrance ito para sa mga kaopisina. Pangalawa, katuparan ito ng pangarap niyang maging calendar model.
“It's supposed to be a farewell gift sa office na pinagwo-workan ko and gift na din sa iba kong friends, hahahaha” mensahe niya sa Philippine Entertainment Portal (PEP.ph) nitong January 2, 2022.
“Bukod sa para lagi nila ako maalala pag titingin sila ng date...”
Ang ginamit niyang photos sa kalendaryo ay mula sa ginawang photo shoot noon pang nakaraang taon.
“Yung photo ko naman galing sa fun shoot namin ng mga friends ko, last October pa yun at naisip ko na gamitin na para hindi masayang yung shoot…”
Pagpapatuloy niya, “Kaya ko naman naisip gawin yun kasi gusto ko talaga maging model ng kalendaryo, legit, na-inspire lang ako kay Ninong Ry sa calendar niya for White Castle.
“Para sakin kasi binali nya yung cliche na calendar na muscular yung model hahaha…
“Kaya ayun, merong calendar na normal na mamamayan yung model hahaha.”
Ang tinutukoy na Ninong Ry ni Arrick ay ang vlogger na si Ryan Morales Reyes, na nakilala sa content niya ng pagluluto.
Inilunsad si Ninong Ry bilang calendar model ng liquor brand na White Castle Whiskey noong January 2021.
Binali ng liquor brand na ito ang tradisyong mga female celebrities ang kinukuha bilang calendar girls.
Kabilang sa past models ay sina Lorna Tolentino (1982), Carmi Martin (1984), Cristina Gonzales (1992), Glydel Mercado (1996), Angela Velez (2000) Roxanne Guinoo (2007) at Meg Imperial (2015).
Sabi ng brand, kinuha nilang calendar model si Ninong Rye noong 2021 dahil sa “new era.”
“Break the norm mga brodie!” post ni Ninong Ry nang ibahagi niya sa social media ang kanyang calendar.
Samantala, sinabi ni Arrick na 10 copies lamang ang ipina-print niya ng kanyang pinasadyang kalendaryo.
Pero mukhang madadagdagan ito dahil mas marami raw ang humihingi.
Aniya (published as is), “So far 10 palang talaga yung copy ko na A4 size, kasi pang gigift ko lang talaga…
“And hindi ko ineexpect na marami makakapansin nung post ko hahaha…
“Sobrang daming nanghihingi kaya plan ko mag print out ng more copies and kung may budget, baka mas lakihan ko yung size.”
Sa kabilang banda, magkakahalo ang komento ng netizens sa ginawa ni Arrick.
May ilang mga negatibo, pero marami rin ang natuwa at sinuportahan si Arrick.
“Walang basagan ng trip,” komento ng isa.
“Self love at its finest,” sabi naman ng isa pa.
Dumagsa rin ang comments ng netizens na nagbahagi rin ng kanilang sariling version ng kalendaryo.