Kitang-kita ang kaligayahan sa mukha ni Karla Estrada nang ganapin ang kanyang birthday celebration sa District 8, San Juan City, Miyerkules ng gabi, November 20.
Ngayong November 21, Huwebes, ang aktuwal na ika-45 kaarawan ng Magandang Buhay host at ina ng matinee idol na si Daniel Padilla.
Apat na videos na kuha mula sa party ang ibinahagi ng matalik na kaibigan ni Karla na si Vice Ganda sa Instagram Stories.
Sa unang video, makikita si Karla na kinakantahan ng birthday song ng kanyang mga kaibigan, habang hawak-hawak ng boyfriend niyang si Jam Ignacio ang birthday cake.
Sa pangalawang video, nakunan ang paghalik ni Jam sa labi ni Karla.
Sa ikatlong video ay makikita namang kilig na kilig ang magnobyo.
Sa taped episode ng Magandang Buhay noong November 14, umamin si Karla na may relasyon na sila ni Jam.
Pero hindi siya nagbigay ng iba pang detalye tungkol sa non-showbiz boyfriend.
Base sa pagsasaliksik ng PEP.ph (Philippine Entertainment Portal), si Jam ay may negosyong car professional detailing sa Novaliches, Quezon City.