May halong biro ang pagtanggi ni Heart Evangelista sa hinala ng maraming netizens na buntis siya.
Pero sinegundahan ng mismong kapatid ng 34-anyos na actress-visual media artist-vlogger, si Camille “Cam” Ongpauco, ang pahayag na ito sa naging palitan nila ng komento sa Instagram.
Sa Instagram post ni Heart nitong Huwebes ng hapon, November 28, ibinahagi niya ang sariling childhood photo kasama ang nakatatandang kapatid na si Cam.
Sa picture, kapwa sila nakaupo sa swing at kapansin-pansing twinning ang suot nilang jumper pants.
Caption ni Heart: “Childhood memories. (relieved face emoji)”
Nagkomento si Cam na naaalala niya kung paanong laging pinagpapareho ng kanilang mga magulang ang suot nila ni Heart.
“I remember this (heart emoji) They would always dress us the same!” kuwento ni Cam.
Dagdag ni Cam, gaya nilang magkapatid, magiging twinning din ang damit ng anak niyang si Bella at ng “baby” ni Heart “in God’s perfect time,” na sinundan ng praying hands emoji.
Si Bella ay anak ni Cam sa Filipino-British model at professional rugby player na si Andrew Wolff.
Tatlong sparkling heart emojis ang unang isinagot ni Heart sa kapatid.
Sa isa pang reply ni Heart kay Cam, sinabi nitong walang problema sa kanya kung gagamitin ng baby niya ang lahat ng napagliitang damit ni Bella.
Sagot ni Heart kay Cam (published as is): “my baby could also just have all of Bella’s old clothes I don’t mind (three rolling in the floor laughing emojis)”
Sumingit naman ng komento si Andrew: “Tapos naging boy, ayyyy!”
Tinawanan lang ni Heart ang comment ni Andrew.
FANS CONTINUOUSLY PRAY FOR ANOTHER PREGNANCY FOR HEART
Sa naging palitan ng komento ng magkapatid, may Instagram follower si Heart ang naniniwalang totoong nagdadalantao ngayon ang aktres.
Sinabi ng iba pang fans na ipinagdadasal nilang sana nga ay mabuntis uli ang social media influencer-fashion icon.
Nauna rito, Huwebes ng umaga nang nag-tweet si Heart upang sabihing buntis siya—sa pagkain ng chicken ng isang Korean restaurant, pero siya ay “not pregnant pregnant.”
Guys I’m pregnant with Bonchon chicken not pregnant pregnant .
— LoveMarie O. Escudero (@heart021485) November 28, 2019
Reaksiyon ng ilang Twitter users, muntik na silang napasigaw sa tuwa dahil inakala nilang kinumpirma ng Kapuso actress ang balitang buntis ito.
THE PHOTO THAT SPARKED PREGNANCY RUMORS
Umugong ang espekulasyon ng pagdadalantao ng celebrity endorser dahil sa litratong ipinost niya nitong November 24 kasama ang asawang si Sorsogon Governor Chiz Escudero.
Pinansin ng netizens ang pagkakasapo ng gobernador sa tiyan ni Heart, at iginiit na may “baby bump” ang huli.
Noong nakaraang taon, dumanas ng magkasunod na miscarriage si Heart sa kambal na panganay sana nila ni Chiz.
Kasunod nito, nangako ang aktres na hindi kaagad isasapubliko ang susunod niyang pagbubuntis, at kukumpirmahin ito “only when I give birth.”
