May banat muli si Janus del Prado para sa isang taong hindi niya pinangalanan.
Sa Instagram ni Janus kagabi, April 15, nag-post siya ng quote kung saan ikinukumpara ang isang tunay na lalaki sa isang duwag na tao.
Ang tunay na lalaki raw ay marunong tumanggap ng pagkakamali, ngunit ang duwag na tao ay umaakto lamang na biktima at ipinapasa ang sisi sa iba.
Nakalagay sa quote card na ibinahgi ni Janus: “A real man will apologize for his mistakes and accept his shortcomings to try to become a better version of himself.
“A coward will lie, manipulate, redirect blame and play the victim role just to save face.”
Simpleng “#titoquotes” ang caption ni Janus dito.
View this post on Instagram
Halos lahat naman ng nagkomento sa post na ito ni Janus ay naniniwalang patungkol ito sa ex-boyfriend ni Bea Alonzo na si Gerald Anderson.
Matalik na magkaibigan sina Janus at Bea.
Si Janus ang isa sa unang nagtatanggol sa aktres tuwing nasasangkot ito sa kontrobersiya, partikular na dahil sa “ghosting” na naranasan umano ni Bea mula sa dating nobyong si Gerald.
Marami rin sa nagkomento ang tinag pa ang account ni Gerald sa Instagram upang ipamukhang tila siya ang pinatatamaan ni Janus.
NOT THE FIRST TIME
Hindi ito ang unang pagkakataong tila pinasaringan ni Janus si Gerald sa kanyang Instagram posts.
Dalawang beses na niyang pinatamaan si Gerald kung pagbabasehan ang mga komento ng nakasubaybay sa mga ibinabahagi ni Janus sa kanyang account.
Una na rito ang post ni Janus noong March 5, ilang oras matapos umamin si Gerald na sila na nga ni Julia Barretto.
Sa nasabing rebelasyon ni Gerald, sinabi nitong naging masyadong "toxic" ang relasyon nila ni Bea.
Buwelta ni Janus sa post niya, kahit wala itong direktang pinatutumbukan: “No matter how it ended. You do not destroy someone you used to love.”
Noong March 7 naman, may isang bagong quote na in-upload si Janus sa kanyang Instagram account.
Nakasaad sa photo quote: “You don’t have to put others down just to prove that you’re truly happy. If you’re happy and you know it, clap your hands. @janusdelprado”
Nakalagay sa caption: “chos. (grinning squinting face, grinning face with sweat, victory hand, heart emojis) #titojokes #titoquotes #goodvibesonly”
Sa lahat ng kanyang posts, iisa lang ang tinutumbok ng netizens sa mga komento—si Gerald.
Pero nananatiling tikom ang bibig ng aktor at wala ni isang sinagot sa mga patama sa kanya.
