Kumulo ang dugo ni Ai-Ai delas Alas nang kantiin ng basher ang tahimik na relasyon nila ng asawang si Gerald Sibayan.
Nag-ugat ito sa family picture na ipinost ni Ai-Ai sa kanyang Instagram noong Linggo, Hulyo 25.
Naroon ang dalawang anak ni Ai-Ai na sina Sancho at Sophia. Kasama rin nila ang fiancée ni Sancho na si Shanna Retuya at fiancé ni Sophia na si Vincent Bautista.
Masaya si Ai-Ai dahil bihira lang daw silang makumpletong pamilya.
Sa comments section ng post ni Ai-Ai, biglang pinuntirya ng isang basher ang age gap nina Ai-Ai at Gerald.
Sabi ng basher kay Ai-Ai, "Anong tawag ng mga anak mo sa asawa mo? Eh mukang matanda pa po anak mo sa asawa mo? Ask lang."
Hindi nakapagtimpi si Ai-Ai sa basher.
Gigil na buwelta ng Kapuso actress: "tawag ko sa asawa ko darl tawag ko sayo TAE HAHAHHAHAA G*G* U*L*!!!"
Twenty-nine years ang age gap ng mag-asawa, pero bukas sa pagsasabi sina Ai-Ai at Gerald na hindi ito hadlang sa masayang pagsasama nila.
Pinuna rin ni Ai-Ai ang pagtanggal ng basher ng display photo nito sa Instagram.
Ang lakas daw ng loob mang-alipusta ng basher gayong "laki laki ng mukha mo parang kinagat ng ipis."
Hirit pa ni Ai-Ai, "nananahimik pamilya namin sa masayang dinner dami mong sinabi animal!!!!"
Sumagot din sa basher pati mga anak ni Ai-Ai.
Sabi ni Sancho: "ako tawag ko kay @gerald_sibayan kumpadre... tawag namin sa mga katulad mo k*pal."
Dagdag ni Sophia, "Gerald" ang tawag niya sa mister ng inang si Ai-Ai. Bagay naman daw tawaging "epal" ang basher.
Tinawag naman ni Shanna na "pangit" ang lalaking nambatikos kay Ai-Ai.
Hindi nakuntento ang basher na nangatuwiran pa, "Me msama ba kong sinabi ha? Nag tatanong lang nagalit na kayo kagad? Sus."
Sagot ni Ai-Ai, "Masama ba mag sabi ng totoo na una ang laki ng muka mo pangalawa nanahimik pamilya namin tanong mo pang mal edukado."
Sina Ai-Ai at Gerald ay ikinasal sa Christ The King Church sa Green Meadows, Quezon City, noong December 12, 2017.
Noon lamang April 2021 ay ipinagdiwang ng dalawa ang ikapitong anibersaryo ng una nilang pagkikita.
Regalo ni Gerald kay Ai-Ai ang na gawing Hello Kitty ang disensyo ng buong bahay nila mula dining area at living room hanggang sa master's bedroom.
Sobrang natuwa si Ai-Ai sa sorpresang iyon ni Gerald dahil ipinaayos ito ng mister habang nasa lock-in taping ang aktres ng defunct GMA prime-time series na Owe My Love.