Isa si Kim Chiu, 31, sa mga nag-cheer kay Kisses Delavin, 22, sa katatapos lang na Miss Universe Philippines 2021 pageant.
Si Kisses na isa sa fan favorites, ay nakaabot hanggang Top 10.
Via Instagram Story, ipinost ni Kim ang panonood niya ng national pageant at nagbibigay ng update.
Mahihinuhang fan si Kim ng major pageants, dahil mahilig mag-post kapag grand coronation events.
“Oh, who’s gonna win? Exciting…” boses ni Kim habang ipinakita sa video ang countdown ng pagsisimula ng national pageant noong September 30, 2021, Biyernes.
“Ayan naa. Oh my gosh,” excited na sabi ni Kim nang magsimula na ang opening presentation ng mga kandidata.
Nag-video si Kim nang sumagot na si Kisses sa the question-and-answer portion.
“Ang galing ni Kisses. Congrats, Kisses,” magiliw na sabi ni Kim.
“Grabe, woman na,” dugtong pa ng It’s Showtime host, bilang paghanga sa naging transformation ni Kisses bilang beauty queen.
Bagamat burado na ang videos na ito ni Kim ay ni-repost ito ng isang showbiz vlog sa YouTube.
Ipinakita rin sa video na ipinost ng kapatid ni Kim na si Twinkle na magkakasama silang pamilya na nanood ng Miss Universe Philippines 2021 pageant.
“Naging family event ang panonood ng miss u ph!!!!” caption ng kapatid ni Kim.
Makikita rin sa video ang pagsasaya ni Lakam, isa pang kapatid ni Kim nang tawagin ang pangalan ni Miss Cebu City Bea Luigi Gomez bilang grand winner.
Sina Kim ay mga Cebuano.
Sina Kim at Kisses ay parehong produkto ng ABS-CBN reality-based TV show na Pinoy Big Brother.
Si Kim ang itinanghal na Big Winner ng PBB Teens noong 2006, habang si Kisses ay runner-up ng PBB Lucky 7 noong 2017.