Muling lumutang ang lumang video ng sagutan nina Miss Manila 2020 Alexandra Abdon at Herlene “Hipon” Budol higit isang taon na ang nakalilipas.
Si Alexandra ay ang Miss Universe Philippines 2020 candidate na nag-viral sa preliminary interviews ng national pageant two years ago.
Muling binuhay ng netizens ang video kung saan nagharap sina Herlene at Alexandra sa isang episode ng dating Kapuso game show na Wowowin: Tutok to Win noong December 2020.
Sa video na ito, nagpatalbugan ang dalawa kung sino sa kanila ang mas sexy, mas sosyal, at mas maganda.
Ipinagdiinan dito ni Alexandra ang pagiging “squammy at “iskwater” ni Herlene.
Sinabi rin ni Alexandra na walang karapatang maging beauty queen si Herlene.
Ani Alexandra: “Kahit magpa-pageant ang nanay ni Hipon sa bahay nila, hindi siya qualified. Hindi ka qualified, Hipon, kahit magpa-pageant nanay mo…”
Sabi niya ukol kay Herlene: "Yung standards lang, yung qualifications medyo tagilid tayo doon."
Ang netizen na nag-repost ng video na ito ay dinugtungan ng video ni Herlene nang mapasali ito sa Top 40 official candidates ng Binibining Pilipinas 2022 kamakailan.
NETIZENS SLAM MISS MANILA AFTER REVIVAL OF VIDEO
Umabot sa higit 9,000 reactions ang edited video na ito na ipinost noong April 24, 2022, at daan-daan ang comments at shares.
Malinaw na binuhay ang isyu kasunod ng pagiging official candidate ni Herlene sa Binibining Pilipinas 2022.
Naging maaanghang din ang komento para ipagtanggol si Herlene at muling ma-bash si Alexandra, gaya ng nangyari matapos nilang magharap ni Herlene sa Wowowin.
Pagtatanggol ng isang netizen kay Herlene: “She proved to Ms Manila that shes totally wrong. Slap back to her face.”
Ang isa pa, tinawag na “kulang kulang” si Alexandra.
Hirit ng isa pa laban kay Alexandra: “Sayang kaya d sumikat at nagng artista to dto sya nadale, attitude and medyo off ugali.”
Bash ng isa pa kay Miss Manila: “Gandang ganda sya sa sarili. Over confident si Ms Manila sa totoo lang. Para sakin mas qualified pa si hipon sa kanya.”
Ilan lang ito sa mga batikos ng netizens kay Alexandra dahil sa nabuhay na video.
hipon vs. miss manila was SCRIPTED
Pero hindi lahat ay pamba-bash. Ipinaliwanag ng ibang netizens na scripted ang ginawang sagutan nina Herlene at Alexandra sa Wowowin episode noon.
Paliwanag ng isa: “Mga gullible at mapagpatol sa fake news wahahahahha..
“They’re good friends, scripted ang issue nila..
“Kawawa naman si Miss Manila mababash na naman, may ma e’content lang kayo!”
Pagsang-ayon ng isa pa: “OK naman sila. They’re friends na. Nananahimik na si miss manila.”
Himutok ng isang netizen, patunay ang video na maraming tao ang nalilinlang sa videos na hindi tunay na nauunawaan ang konteksto nito.
Nang pumutok ang isyu noong 2020, kinumpirma ni Miss Manila na ang nangyaring sagutan nila ni Herlene ay scripted.
Ipinost noon ng isang supporter ni Alexandra ang pagtatanong niya kung scripted ang sagutan nila ni Herlene.
Tanong ng supporter kay Alexandra: “bb? Diba scripted lang lahat sa wowowin? [Teary-eyed face emoji]"
Tugon ni Alexandra: “Yes po! [smiling face emoji] Pero yung bash, hindi. Hehe.
“But issokay! Kilala nyo naman ako. [smiling face emoji]”
Sa isa pang comment, binatikos ng isang netizen si Alexandra sa pagtawag niya ng “squammy” kay Herlene.
Paliwanag ni Alexandra, “napagutusan lang po. just doing my job,” indikasyong scripted nga ang paghaharap nila ni Herlene.
Kasunod pa ng isyung ito ay nagkaroon ng mga collaboration sina Herlene at Alexandra na mga video content at ipinaliwanag na magkaibigan sila.
