Diretsahang inamin ni Bea Alonzo na hindi niya kayang makipagkaibigan sa ex-boyfriend na si Gerald Anderson.
Si Bea ang ika-apat na Kapuso star na sumalang sa Fast Talk With Boy Abunda, ang bagong showbiz-oriented talk program ni Boy Abunda sa GMA-7, ngayong Huwebes ng hapon, January 26, 2023.
Isa sa mga tanong ni Boy ay may kinalaman sa nakaraan ni Bea.
Napansin daw kasi ng TV host na nananatiling mabuting magkaibigan sa Bea sa ex-boyfriend niyang si Zanjoe Marudo bagamat natapos sa breakup ang ilang taon nilang relasyon.
Tanong ni Boy: “Kaya mo bang makipagkaibigan kay Gerald, not now but in the future?”
Mabilis na sagot ni Bea: “Hindi, because I can never be friends with somebody I cannot trust and somebody who doesn’t take responsibility for his actions.
“So, siguro hindi.”
Inamin din ng Kapuso actress na nagtampo at nasaktan siya nang interbyuhin ni Boy si Gerald noong March 5, 2021 tungkol sa kontrobersiyal nilang hiwalayan.
Read: Bea Alonzo says no formal breakup with Gerald Anderson
Sa naabiing interview, sinabi ni Gerald na hindi niya ghinost si Bea, salungat ito sa sinasabi ng aktres na dahilan ng kanilang breakup.
Ang ghosting ay colloquial term na nangangahulugang biglang hindi pagpaparamdam sa taong karelasyon o kamabutihan.
Sabi ni Bea, ito ang ginawa sa kanya noon ni Gerald dahil bigla na lang siyang hindi kinausap ng aktor.
Saad ng aktres kay Boy, “Oo [nagtampo], kasi tao lang ako Tito Boy.
“Kahit sino siguro ang mag-interview sa kanya at that time, it would hurt, especially kung half the time he wasn’t telling the truth.”
Read: Gerald Anderson on ex-girlfriend Bea Alonzo: “Being together, we were very toxic.”
Hindi pinalampas ni Boy na tanungin kay Bea ang sinasabi nitong hindi umano nagsasabi ng totoo si Gerald.
Sagot ni Bea: “Siguro yung pinakamalaking pagsisinungaling niya was that he never ghosted me, because he did.”
Read: Gerald Anderson finally speaks up about breakup with Bea Alonzo; clears Julia Barretto
Nilinaw rin ni Bea na kaya siya ngayon nagsasalita ay dahil tinatanong sa kanya ang tungkol sa nakaraan nila ni Gerald.
Ayon pa sa aktres, naiintindihan niya si Boy at tinatanggap niya ang paghingi nito ng tawad, lalo na’t sinabi ng veteran TV host na noong naganap ang one-on-one interview niya kay Gerald ay nasa isip niya kung ano ang mararamdaman at magiging reaksiyon ni Bea.
Sabi ni Bea, “Doon po sa pagtatampo ko sa inyo, at first, of course I’m human. Yes, masakit sa akin.
“I was crying, nasa farm kami noon. But then, tao rin ako at natuto ako.
“I realized it’s part of your job and as a great interviewer, alam ko na bawat sides of the story kailangan mong malaman.”
Samantala, sa kasalukuyan ay parehas nang masaya sina Bea at Gerald sa sari-sarili nilang karelasyon.
Si Bea kay Dominic Roque at si Gerald kay Julia Barreto.