Napukaw ang atensiyon ng netizens sa ipinost na larawan ni Kim Atienza kasama sina Billy Crawford at Eric Tai a.k.a. Eruption.
“Eats Chowtime!” halatang may birong caption ni Kim sa multiple photos na ipinost niya sa IG kasama sina Billy at Eric ngayong Martes, June 6, 2023.
Ang caption ay katunog ng It’s Showtime, ang noontime show ng ABS-CBN kung saan naging co-hosts noon ang tatlo.
Naunang ipinost ni Eric nitong Lunes, June 5, ang mga parehong larawan at may caption na ganito: “Friends. Family. Rides.”
Mahihinuhang nagkita-kita ang tatlo para mag-bonding via motorbiking na isa sa kanilang hobbies.
Biro naman ni KC Montero sa post ni Eric: “Y’all starting your own show? Eat showtime lol?”
Sagot ni Eric: “we just chillin’ bro! Catch you on rides soon!”
Nagkataon na sina Kim at Billy ay visible ngayon sa GMA Network.
Sina KC at Billy ay co-hosts sa defunct noontime show ng TV5 na Tropang LOL.
KIM ON EAT BULAGA! issue
Hindi maiwasang magkomento ng netizens tungkol sa litrato ng tatlong former co-hosts ng It’s Showtime.
Hindi rin nakaligtas si Kim sa pang-iisyu ng ibang netizens.
Naging matunog ang pangalan ni Kim na posibleng ipasok sa Eat Bulaga! bilang isa sa kapalit nina Tito Sotto, Vic Sotto, Joey de Leon, at iba pang Dabarkads hosts.
Read: Kim Atienza, kinukuhang "Eat Bulaga" host?; Paolo, Buboy, Betong, kasado na?
Ipinakilala na ang bagong hosts ng Eat Bulaga! nitong Lunes, pero hindi kasama si Kim.
Sa comments ng kanyang IG post, tinanong si Kim kaugnay ng isyung ito.
Maanghang ang akusasyon ng isang netizen na kinuwestiyon ang “delikadesa” at “dignity” ng TikToClock host.
Sabi nito kay Kim (published as is): “So they say you will be part [of] FAKE eat bulaga host. Don’t you have any delikadesa in your body? Is this just for the money? OMG! Have some dignity!”
Sagot ng Kapuso TV host: “hingang malalim para di ka praning. Stay away from drugs.”
Makikitang burado na ngayon ang komentong ito.
May isa pang nagkomento na kinampihan si Kim hinggil sa isyu.
Sabi ng netizen, kung tanggapin man ni Kim ang hosting job ay karapatan niya ito. Wala raw masama kung tanggapin niya ito dahil naghahanapbuhay siya.
Pinusuan ni Kim ang komento ng netizen.
Diretso naman ang tanong ng isang netizen: “Eat bulaga ba Kuya kim”
Sagot ng host: “nope”
Una na ring binanggit ng manager ni Kim, ang PEP Troika columnist na si Noel Ferrer, na hindi tinanggap ni Kim ang Eat Bulaga! hosting job dahil sa daily game-variety show nitong TiktoClock.
Ang TiktoClock ay umeere bago ang Eat Bulaga!.
Bukod pa rito ay napapanood din si Kim sa Kapuso primetime news program na 24 Oras.
Samantala, marami ring netizens ang nagkomento tungkol sa tatlo tungkol sa pagiging dating It’s Showtime hosts na sinagot naman ni Kim ng “raised hands” emoji, indikasyong aprubado siya sa mga ganoong komento.