Araw na lamang ang binibilang at isisilang na ni Ellen Adarna ang anak nila ni John Lloyd Cruz.
Kahapon, June 17, nakatanggap ng impormasyon ang PEP.ph (Philippine Entertainment Portal) na namataan daw si Ellen sa isang private hospital sa Cebu noong Sabado, June 16, para sa isang routine check-up bago ito manganak.
May clinic daw sa nasabing ospital ang OB-Gyne o doktor ni Ellen.
Pero walang larawan na maipakita ang aming source kaya hindi muna namin ito isinulat.
Ngayong Lunes, June 18, nagpadala ang aming source ng larawan nina Ellen at John Lloyd na kuha raw habang papalabas sa isang clinic sa Chong Hua Hospital sa Mandaue, Cebu.
Nakasuot ng maluwag na itim na T-shirt si Ellen. Nakatsinelas din ang aktres.
Nasa kanyang likuran ang partner nitong si John Lloyd.
Hindi masyadong malaki ang tiyan ng 30-year-old actress ngunit halatang nadagdagan ang kanyang timbang.
Nai-publish na rin ang larawang ito sa Facebook page ng Newsgraph.
Nagpaalam ang PEP.ph sa may-ari ng litrato bago namin inilabas ang kuwentong ito, at pumayag naman sila.
Ayon naman sa isa pang source ng PEP.ph, hindi raw nagpa-ultrasound si Ellen dahil gusto nila ni John Lloyd na masorpresa kung lalaki o babae ang magiging anak nila.
Matatandaang naghain ng motion for trial rescheduling ang abugado ni Ellen dahil anytime soon ay manganganak na nga siya.
Kaugnay ito ng reklamong child abuse at cyber libel na isinampa ng mga magulang ng teenager na si Eleila Santos, na inakusahan ni Ellen ng patagong pagkuha ng video nila ni John Lloyd sa loob ng isang ramen restaurant sa Makati City noong May 14.