Bumalik na sa Metro Manila kahapon, July 18, ang male cast ng Philippine adaptation ng Descendants of the Sun mula sa gruelling training nila sa Fort Magsaysay, Nueva Ecija.
Ang Descendants of the Sun ang upcoming primetime series ng GMA-7.
"Dusa" at "malupit" ang mga salitang ginamit ni Rocco Nacino nang i-describe nito ang mga naranasan nila ng kanyang mga co-star na sina Dingdong Dantes, Paul Salas, Jon Lucas, Prince Clemente, at Lucho Ayala.
Kuwento ng Kapuso actor sa Cabinet Files, "Malupit ang training namin dahil ang two-year training course ng Special Forces, ginawa namin in two days at napahanga ako sa mga kasama ko.
"Kahit civilians kami, kahit papaano nakasabay kami sa training ng mga sundalo natin.
"Pero kapag nakakausap namin ang fellow SF trainees, sinasabi nila na yung ginawa namin, ten percent lang ng mga ginagawa nila.
"The most difficult part of the training is maintaining that mental state or mindset na kailangan matapos o magawa ito for the betterment of ourselves and the country.
"Sa training namin, hindi lang ang pisikal ang mahalaga dahil mas importante pala ang mental capabilities.
"They really break you down para maging malakas ka.
"Pinakadusa talaga ang exercise namin every other hour. Kailangan ma-complete namin para ma-instill ang discipline.
"Kahit bago matulog, exercise pa rin kaya mahirap matulog.
"Pero napakaganda na experience dahil yung paghihirap nila sa amin ay para sa ikabubuti ng mga magiging Special Forces."
Walang special treatment na ibinigay kina Rocco, Dingdong, at sa kanilang ibang mga kasamahan sa dalawang araw na training nila sa Fort Magsaysay.
"We were treated as army men. They made sure we understand yung mga pinagdadaanan nila," sabi ni Rocco.
Nagpapasalamat si Rocco dahil nabigyan siya ng pagkakataong maranasan ang buhay-sundalo.
"Mabuti na lang, ginawa namin yun dahil hindi basta-basta ang maging sundalo.
"You really have to understand why they are doing that.
"Natutunan ko na kaya tayo masaya at nag-e-enjoy sa buhay natin ay dahil ginagawa ng mga sundalo ang mga trabaho nila.
"Doon namulat ang mga mata ko.
"Actually, nabuksan yung mga mata ko. Why not be of service, di ba?
"Puwede rin maging reservist para makatulong sa bansa in times of need."
Kung hindi magkakaroon ng pagbabago sa schedule, magsisimula sa darating na linggo ang taping ng Descendants of the Sun.
Ang karakter ni Wolf ang gagampanan ni Rocco.
Si Wolf ang master sergeant na kaibigan ni Big Boss, na bibigyang-buhay ni Dingdong.