Ang Hashtags member at Star Magic talent na si McCoy de Leon ang bagong contract star ng Viva Artists Agency.
Isang virtual media conference ang magaganap bukas, August 28, para kay McCoy.
Dito niya sasabihin ang mga dahilan ng paglipat niya sa talent management agency ng Viva Entertainment.
Ang 25-year-old actor ang pangalawang contract star ng Star Magic na lumipat sa Viva Artists Agency (VAA) sa panahon ng pandemic at panahong pinagkaitan ng Kamara ng prangkisa ang ABS-CBN noong July 10, 2020.
Nauna nang pumirma ng kontrata sa Viva Artists Agency noong August 12 si Diego Loyzaga, na dating talent din ng Star Magic, ang talent management arm ng ABS-CBN.
Nagsimula ang showbiz career ni McCoy noong 2012 nang maging mainstay siya ng TV series na Be Careful With My Heart ng Kapamilya Network.
Ang D ‘Ninang ang isa sa mga huling pelikulang ginawa ni McCoy sa bakuran ng Regal Entertainment bago siya pumirma ng kontrata sa Viva Artists Agency.
Nagsimula ngayong Huwebes, August 27, ang Netflix streaming ng D ‘Ninang na pinagbibidahan ni Comedy Queen Ai-Ai delas Alas.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika
