Kung hindi magkakaroon ng pagbabago sa plano, magsisimula sa March 14, 2021 ang shooting ng A Moment to Remember, ang unang movie teamup nina Bea Alonzo at Alden Richards.
Nakatakda naman sa papasok na linggo ang story conference ng Philippine adaptation ng South Korean blockbuster romance drama film na pinagbidahan nina Son Ye-jin at Jung Woo-sung, at ipinalabas sa mga sinehan noong November 2004.
Co-production venture ng Viva Films at GMA Pictures ang Philippine version ng A Moment to Remember na mula sa panulat ni Mel del Rosario at direksyon ni Nuel Naval.
Ang kuwento ng pelikula ay tungkol sa isang babaeng may Alzheimer’s Disease na hindi iniwanan ng kanyang asawa.
At inaasahang mabibigyan nina Alden at Bea ng hustisya ang mga karakter na gagampanan nila.
Ang box-office success ng A Moment to Remember noong 2004 ang diumano’y naging inspirasyon ng apat na pelikula at isang television series na tungkol din sa babae na may Alzheimer’s Disease ang plot.
Heto sila:
Indian movie na U Me Aur Hum (You, Me and Us, 2008)
Evim Sensin (You Are My Home, 2012 ) ng Turkey
Selagi Masih Ada (2012) ng Malaysia
2018 Malaysian Tamil Film na Neeyim Naanum
2011 South Korean television series na A Thousand Days’ Promise
Pure Soul
Para sa kaalaman ng lahat, hindi original South Korean film ang A Moment to Remember dahil halaw ang kuwento nito sa Pure Soul, a Japanese television drama series na may labindalawang episodes at ipinalabas sa YTV Japan mula April 9, 2001 hanggang June 25, 2001.
