Kumalat ang mga haka-haka na may proyekto na gagawin sina James Reid at Liza Soberano dahil mga larawan nila na magkasama na kuha sa Amerika at pinagpasa-pasahan sa social media.
Walang kumpirmasyon kung may pinaplano na collaboration ang dalawa pero isang bagay ang sigurado, lilipat na si Liza sa Careless, ang talent management company ni James.
Ito ay ayon sa isang taong may kakilala sa kumpanya ni James.
Reportedly, hindi na ni-renew ni Liza ang kontrata sa mga dating namamahala sa kanyang showbiz career dahil nagdesisyon siya na lumipat sa Careless.
Inaasahang magsasalita si Liza sa mga susunod na araw tungkol sa mga pagbabagong mangyayari sa kanyang entertainment career.
Hinihintay rin ang official statement ng Careless tungkol sa paglipat ni Liza sa kanilang kompanya.
(Ed's Note: Agad na nag-reach out ang PEP.ph sa longtime manager ni Liza na si Ogie Diaz para kunin ang panig nito tungkol sa usap-usapang hindi na pagre-renew ng kontrata ni Liza sa kanya at hindi na siya ang manager nito.
"Ako pa din," ang sagot ni Ogie. Dagdag pa nito, abangan daw ang kanyang official statement tungkol sa balitang ito sa kanyang YouTube channel.)
