Ikinagalak ng mga tagahanga ng Hashtags ang reunion ng apat sa miyembro ng all-male group na dating regular na napapanood sa It’s Showtime, ang noontime variety show ng ABS-CBN, sa Family Feud.
Sina Luke Conde, Tom Doromal, Zeus Collins, at Ryle Santiago ang former members ng Hashtags na naglaro sa October 31, 2022 episode ng top-rating game show ni Dingdong Dantes sa GMA-7.
Pero "Rehashtags" ang pangalan ng grupo na kanilang ginamit sa unang pagkakataon na sama-samang paglabas nila sa isang programa ng Kapuso Network.
Sa apat na ex-members ng Hashtags, si Luke ang natatanging certified Kapuso dahil lumipat siya sa GMA-7 at pumirma ng kontrata sa GMA Artist Center noong June 2021.
Read: Hashtags member Luke Conde signs with GMA Artist Center
Masuwerte ang Rehashtags sa kanilang guesting sa Family Feud dahil napanalunan nila ang jackpot prize na P200,000.
Si Zeus ang nagsilbing spokesperson ng Rehashtags kaya siya ang nagpasalamat dahil naimbitahan silang maglaro sa Family Feud.
Sabi pa niya, “Talagang gabi-gabi naming pinapanood ito sa YouTube ng girlfriend ko.
"Kapag busy, talagang nanonood kami sa YouTube kaya masaya kami dahil nandito kami."
Ang guesting sa Family Feud ng Hashtags members ng ABS-CBN ang nagbigay ng pag-asa sa kanilang mga tagahanga na masundan pa ang paglabas nila sa ibang mga programa ng Kapuso Network.