Nagsimula ang Basic Citizen’s Military Training ng mahigit limampung Pilipinong nangangarap maging Philippine Air Force (PAF) reservist noong July 2023.
Manlawid Class 2023 Bravo ang pangalan ng kanilang grupo.
Umanib sa Manlawid Class 2023 Bravo si Miss Universe Philippines 2023 Michelle Dee noong Setyembre 10, 2023.
Ang "special treatment" na ito diumano kay Michelle ang naging mitsa para ma-demoralize ang ibang aspiring reservists.
Nakaramdam ng pagkadismaya ang mga miyembro ng Manlawid Class 2023 Bravo dahil, diumano, hindi dumaan si Michelle sa wastong proseso.
Nagkaroon sila ng pakiramdam na hindi patas, hindi makatarungan ang nangyayari, at umiral ang palakasan.
Noong July 2023 nag-umpisa ang kanilang matiyagang pag-eensayo sa Villamor Airbase, Pasay City, at pagdalo sa mga Zoom class.
Pero ayon sa kanila, kamakailan lamang nila nasilayan si Michelle.
Nakatakda sa Setyembre 30, 2023 ang graduation day ng Manlawid Class 2023 Bravo.
Kasabay nilang magtatapos bilang PAF Reservist si Michelle, na nagpakita lamang umano sa training camp noong nakaraang Linggo, Setyembre 10, 2023.
Bago pa pormal na sumali si Michelle sa training ng Manlawid Class 2023 Bravo noong Linggo, nauna nang naglabas ng balita ang Sparkle GMA Artist Center tungkol sa pagsali ni Michelle sa reservist training ng Philippine Air Force.
Ang Sparkle ang namamahala sa career ni Michelle.
Nakasaad dito: “Miss Universe Philippines 2023 Michelle Marquez Dee has recently commenced her training to join the Philippine Air Force!
“Despite the expected challenges, she is determined to serve her country and make a difference.
“Her unwavering commitment to public service is truly admirable, and we salute Michelle for her devotion to the nation,” ang balita na ibinahagi ng talent management company na namamahala sa showbiz career ni Michelle.
Ikinalungkot ito ng Manlawid Class 2023 Bravo dahil noong July 2023 pa nagsimula ang kanilang mga klase at training, pero nitong Linggo lamang lumahok ang aktres at reigning Miss Universe Philippines.
Bukas ang PEP.ph sa panig ni Michelle at ng Sparkle kaugnay ng isyung ito.