May kasabihang kapag nagpagupit ng buhok o nagbago ang hairstyle ng isang babae, malaki ang posibilidad na may pinagdaraanan itong krisis sa pag-ibig.
Ganito ang pinaghihinalaang nangyayari ngayon sa aktres na napabalitang hiwalay na sa kanyang actor-boyfriend.
Pinaigsian ng aktres ang dating buhok na mahaba mula nang kumalat ang intriga na may malaking problema sa relasyon nila ng aktor.
Hindi pa nagsasalita ang aktres tungkol sa rumored breakup nila ng aktor pero ang mga tao sa paligid niya ang nagkukuwento sa kanyang natuklasan.
Diumano, nagising ang aktres sa katotohanan nang makatanggap siya ng mga ebidensya—ang screenshots ng mga incriminating text message ng kanyang boyfriend sa iba’t ibang mga babae na matibay na pruweba na hindi faithful ang aktor sa relasyon nila.
Naniniwala ang aktres na totoo at hindi imbento lamang ang mga screenshot na ipinadala sa kanya dahil alam niya ang paraan ng pakikipag-komunikasyon ng aktor.
Hindi pa alam ng aktor ang mga ebidensya na hawak ng aktres kaya umaasa pa siya na maaayos ang kanilang problema at magkakabalikan pa sila.